19 Apr 2018

Kgosi David Toto wa Tsabong a re Batswana ba itsege ka go tlhompha ditshwanelo le ditumelo tsa batho. 

Kgosi Toto o buile jaana kwa phuthegong e e neng e tshwerwe kwa sekoleng se segolwane sa Tsabong kwa ba-na-le seabe ba neng ba kopane go fa baithuti ba mophato wa botlhano magokonyane a botshelo jaaka fa ba tlaa bo ba wetsa dithuto tsa bone ngwaga o ya fifing. 

O boleletse dialogane fa maitseo le tlhong di aga ka e a re motho a bua le ba bangwe a tlhophe mafoko. 

A re bokopano joo, bo diretswe gore ba ithute maele a botshelo ka jaana keletso e le go ba bona ba rutegile mo  ba tlaa kgonang go bereka ba tlhabolola lefatshe la bone. 

Kgosi Toto a re batsadi ba bone ba eletsa go ba bona ba itshetsa ba sa baya mo go ope, selo se ba ka se kgonang fa ba ka tswelela le dithuto. 

A re fa go ka nna le bangwe ba ba ka sekang ba dira sentle, ba iteke go fitlhelela ba fenya, a tlatsa ka go re ba ba tshwarang ka bonako, ba thuse ba bangwe. 

Kgosi o ba kopile gore thutego ya bone e se ka ya ba latlhisa ngwao. 

A re ba tsile go kopana le merafe e e farologaneng gammogo le tiriso ya maranyane mme ba se ka ba itebala. 

Mongwe wa dibui, Rre Khulekani Tobokwani, o kaile fa bokopano joo e le go thusa baithuti go nna le boikarabelo le go ba thusa gore ba kgone go itshetsa morago ga sekole. 

Rre Tobokwani a re baithuti ba tshwanetse go itse gore tshenyetso setshaba ga e letlelelwe mme gape tsholofelo ke gore maitsholo a bone a fetoge. BOKHUTLO