04 Apr 2018

Badiri ba makgotla a Setswana le ba khansele ya Kgalagadi mo Tsabong, e rile bosheng ba tshwara moletlo wa dijo tsa maitseboa le kabo dietsele kwa sekoleng se segolwane sa Tsabong go tiisa badiri moko go tswelela ba ntsha maduo a a kgatlhisang.

Fa a bua kwa moletlong o setlhogo sa one e neng e le Thotloetso ya Bodiredi Kgatelo Pele mo Tokafatsong Maduo, mogolwane go tswa mo khanseleng ya Kgalagadi, Rre Joseph Banyatsang o ne a tlhalosa fa modiro wa go nna jalo o faphegile, ka jaana o dirisiwa go lemoga bokgoni jwa badiri ba tlhwatlhwa ba ba ka nowang moro mo ditirong tsa bone tse di farologanyeng.

Rre Banyatsang o ne a tshwantshanya go dira ka bonatla ga badiri le peo e e jalwang mo mmung o o nonneng, o kwa phelelong o ntshang maungo a a monate a a eletsegang go ka jewa.

Mo godimo ga moo, Rre Banyatsang o kaile fa kabo dietsele e le botlhokwa ka e kgothatsa le go rotloetsa babereki go tsenya marapo dinameng.

Mokwaledi wa khansele ya Kgalagadi, Mme Baipelelang Photlokwe ene o ne a bolela fa badiri ba le botlhokwa mo go tlhabololeng le go isa ditirelo tsa maemo a ntlha kwa setshabeng.

Mme Photlokwe o ne a tlhalosa fa temogo ya bonatla jwa badiri le go ba atswa ka dietsele go ba rotloetsa go itshekatsheka makoa le bokgoni.

A re badiri ba ba kgothetseng ba thusa baeteledipele go tswa ka maele le ditharabololo tsa go thiba diphatlha tse di ka tswang di le teng.

A re puso e tseela kwa godimo go ntsha maduo mo ditirong, ka jalo o ne a gwetlha badiri go dira ba le seopo sengwe le go ithuta maitlamo a puso.

Mo mafokong a gagwe a kgothatso, Rre Kgomotso Jongman  o boletse fa dietsele e le tsela nngwe ya go leboga ba ba dirileng botoka go gaisa ba bangwe.

A re ka jalo, badiri ba tshwanentse go fetola ka fa ba dirang ka teng ka seo e le konokono mo go ntsheng maduo a a kgatlhisang mo ditirong tsa bone tsa tsatsi le letsatsi.

Mongwe wa badiri yo gape a gaisitseng botlhe go tswa kwa lephateng la makgotla a Setswana, Mme Keletso Diphoko o ne a supa fa tshepo ya gagwe mo go ramasedi, boineelo le boitshoko go direla setshaba e le dilo tse di mo kgontshitseng go tswa mofenyi. BOKHUTLO