25 Mar 2018

Tautona Lt Gen. Dr Seretse Khama Ian Khama a re go fologa setilo sa botautona kgwedi eno e fela ga go ree gore o tlaa emisa  go thusa setshaba sa lefatshe leno.

 

Fa a bua kwa moletlong wa go mo tsamaisa sentle kwa Ghanzi ka Labotlhano, Tautona Khama o ne a re go thusa batho ga se maikarabelo a ga Tautona kgotsa puso e le yosi, ka jalo o tlaa tswelela a thusa mo go tokafatseng matshelo a batho le morago ga go tswa mo ofising ya botautona.

 

O ne a supa gore go thusa batho go mo mading le mo pelong ya gagwe.

 

Tautona o ne a kopa badirela puso le baemedi ba setshaba ba sepolotiki go tswelela ba thusa setshaba ka natla le morago ga go fologa setilo. 

 

Tautona Khama o lebogile  banni ba Gahnzi a ba a ba rotloetsa go tswelela ba apara diaparo tsa Setswana/ngwao ya bone le ba ba neng ba phaphasela ka mebala ya folaga ya Botswana go tswelela ba dira jalo, a  re seo se supa gore ba rata ebile ba ikgantsha ka ngwao le lefatshe la bone.

 

O ne gape a lebogela dimpho tse a di filweng  ke banni ba koo, mo go tsone dikgomo di le legolo le masome a mane le madi a a ka tshwarang dikete di supa tsa dipula.  .

 

Jaaka gale, e rile fa go tsena mmino wa polka ka sethopha sa Remmogo Polka Group, Tautona a goga Mme wa Lepodisi a tsena le ene mo seraleng.

 

Morago ga go fologa serala, a tlhalosa fa mmino wa polka o a reng o monate o tsweletse ka go gola sentle.

 

 O ne gape a tlhalosa gore o tlaa tsaya karolo kwa Khawa Dune Challenge go tla go sireletsa bommampudi jwa gagwe jo a bo gapileng ngogola.

 

Tautona Khama o ne a tlhalosa gore kwa Serowe ga se gore o ya go laele, a re ‘banni ba koo ba re e tlaa bo e le kamogelo ya kgosi ya bone e e sa bolong go tsamanya.

 

Go le pele, mopalamente wa Ghanzi Botlhaba, Rre Noah Salakae o ne a leboga Tautona go laela banni ba kgaolo ya gagwe.

Rre Sakake o ne a gakolola morafe gore baeteledipele ba tshwanetse go tlotlwa ka nako tsotlhe. BOKHUTLO