21 Mar 2018

Mothusa  mmatoropo  wa  Lobatse, Rre Francis   Mokwena o  gakolotse  bodiredi le baithuti ba sekole se sebotlana sa Bothakga mo  Lobatse go somarela le go tlhokomela dimpho tse ba di abelwang.

Rre  Mokwena o buile mafoko ao ka Labobedi  jaaka baithuti  ba tsa ditlhaelatsanyo ba sesole sa Botswana ba ne  ba abela sekole seo dimpho tse di akaretsang  dihoko tsa dikgaka, dipidipidi, mebutla le dikolobe le paka ya tsa metshameko.

Mothusa mmatoropo o boletse gore dimpho tse di maleba ka jaana baithuti  ba sekole se ba bangwe ke  ba-na-le bogole, a tlatsa ka  go re fa ba sa kgone, dithuto tsa tlwaelo ba ka ithuta go dira ka diatla ba ntsha maduo.

Mo go tse dingwe Rre   Mokwena o iteetse ba sesole sa Botswana legofi, a re dimpho tse ba di abang tse  di supa gore ba itse mosola wa thuto ka bophara, ka gore ba leka go nonotsha le go nosetsa modi wa thuto.

A re  go ka nna botlhokwa thata mo baithuting ba ba sa kgoneng, mme ba kgona go dira ka diatla, a tlatsa ka go re maikaelelo a thuto ke go ntsha  batho mo lehumeng.

Mogolwane go tswa  kwa go ba sesole, Lt Jeoffrey  Budani, a re ba itumeletse go rolela baithuti  dimpho tse gore ba ithute le go dira ka diatla .

A  re ke maikaelelo  a bone ke gore ba thuse setshaba.

Lt Budani a re thuto ke lesedi, thuto ke boswa mme  ya diatla yone  ke e motho a ka itshetsang ka yone.

Mogolwane go tswa kwa lephateng la   thuto, Rre Chidesta  Moselakatane a re go ruta baithuti ba ba nang le bogole ga se tiro e e e bonolo, mme a akgola botlhe ba ba nnileng le seabe go abela sekole seo le baithuti gore ba ithute ka tsa temo-thuo, a tlatsa ka go re dimpho tse di tlaa tokafatsa maduo.

A re e le ba  lephata la thuto  ba rotloetsa mowa wa go thusa dikole ka lenaneo la go itlhophela sekolo go se tlhokomela mme a leboga thata Rre Shima Ranna yo o tlhokomelang sekole seo sa Bothakga.

Kabo dimpho eo e ne e akaretse hoko ya dikoko e e setse e na le dikolobe di le thataro, e abilwe ke mokhanselara yoo o itlhophetsweng ke tona, Rre Phetogo Kgotlhwane, hoko ya dikgaka go tswa mo go ba sesole  dipidipi le mebutla ka thuso ya ga mme Betty Malebye.BOKHUTLO