05 Mar 2018

Mothusa mokwaledi mogolo wa khansele-potlana ya Good Hope, Rre Robert Rabasimane o kgothaditse badiri ba khansele-potlana ya Tsabong go tswelela ba dira ka bonatla go tlhomamisa gore ba ntsha maduo a tlhwatlhwa go dira pharologanyo mo matshelong a Batswana.

Rre Rabasimane o buile jaana mo tshidimolodisong ya kabo dietsele tsa khansele-potlana ya Tsabong  e le la ntlha bosheng.

A re tiro e e ne e le thotloetso le gone go lemoga bokgoni jwa bodiredi go tswelela ba  ntsha ga tshwene mo ditirong tsa bone tsa letsatsi le letsatsi.

Mothusa mokwaledi o ne a bolela fa setlhogo sa letsatsi  leo sa Go Supa Boleng ka Bodiredi jo bo Kgothetseng se rotloetsa bodiredi go dira ka natla, a kaya fa more mogolo go betlwa wa taola, wa motho o ipetla.

A re go botlhokwa gore e re le fa modiri a ya go direla go sele a bo a tlogetse motlhala le leina  le lentle le a ka salang  a gakologelwa ka lone ka ntlha ya go direla Batswana ka botshwrere le bopelotelele.

Rre Rabasimane fa a ama boeteledipele jwa khansele eo ka lefoko, o ne a ba kgothatsa  go nna sekao mo go ba a ba eteletseng pele.

O boletse fa boeteledipele jo bo nonofileng bo tlhokana le motho yo o tshwanetseng go dira se a se tlhaloganyang, go kaela, go ruta go lekola le gone go ela tlhoko ka dinako tsotlhe  gore a tiro e dirwa ka fa go tshwanetseng ka teng gareng ga tse dingwe.

A re boteledipele ga se selo se se tsalelwang mme go mo maruding a motho gore  a itshupe gore ene o tshwara le go dira tiro ka tsela e e ntseng jang e e kareng kwa bofelong ya itumelelwa ke setshaba le go tsisa diphetogo le tokafatso mo matshelong a setshaba.

O ne a rotloetsa ba ba sa amogelang dietsele gore ba seka ba kgobega marapo mme ba  intshe kwa morago ba simolole go itoma molomo wa tlase ka go gagamatsa thata mo ditirong tsa bone gore e re mo nakong e e tlang  le bone ba lemogwe fa e le badiri ba ba dirileng ka bonokopila.

Fa a bua maikaelelo a letsatsi leo le go amogela baeng, mothusa mokwaledi wa khansele-potlana  ya Tsabong, Rre Jimmy Mackenzie o tlhalositse  fa e le go leboga le go tiisa moko badiri ba ba ntshitseng tlhogo mo go ba bangwe le makalana a a farologanyeng go tlhomamisa gore ba diragaditsa maitlamo a khansele, e  leng Batho Pele  ka Ngwaga wa 2017/2018  ka go isa ditlamelo tsa tlhwatlhwa kwa Batswaneng  ka nako e e tshwanetseng.

Rre Mackenzie o ne a tlhalosa fa gape e le go lemoga seabe sa bodiredi  ka bongwe ka bongwe le makalana a a farologanyeng mo khanseleng-potlana eo go diragatsa se khansele e leng sone mo nakong ya gompieno.

A re go bereka mmogo ba tshwaraganye,  ba le seopo sengwe, ka bopelotelele, le gone go ithuta mo go tse ba sa di kgonang ke yone konokono mo go iseng khansele-potlana eo kwa pele mme kwa bofelong e nne le  phenyo mo go iseng ditirelo tsa maemo a ntlha kwa setshabeng le ntswa go na le dikgwetlho tse ba lebaneng le tsone.

Mo mafokong a gagwe a kgothatso, mokwaledi wa khansele ya Kgalagadi, Mme Baipolelang Photlokwe o boletse fa khansele-potlana eo e tlhamilwe ka 2011 le ya Hukuntsi  mme a lebogela boeteledipele  gore e bo e setse e itshetletse ka go ne go se motlhofo e tlhaelelwa ke bodiredi le didirisiwa.

Mokwaledi wa khansele ya Kgalagadi o ne a galaletsa khansele-potlana ya Tsabong ka go tsaya boikarabelo le go nna le seabe  le kgodiso mo go tlhomamiseng gore khansele ya Kgalagadi e itlhoma kwa pele ka maemo a ntlha mo dietseleng tsa 2017/2018 go gaisa dikhansele di le lesome le botlhano mo lefatsheng leno.

Mme Photlokwe a re le ene o ne a ikgapela maemo a ntlha a mokwaledi wa khansele yo o gaisitseng ba bangwe, selo se a reng se mo nametsa pelo le go feta le gone go gwetlha badiri go tswelela ba dira ka botswerere le bonokopila mo go thuseng Batswana le gone go isa ditlamelo tse di ka tlhabololang le go tokofatsa  matshelo a bone.

Maphata le makalana a a farologanyeng mo khaseleng-potlana ya Tsabong, babereki  ba ba gaisitseng ba bangwe, ba ba  berekileng dingwaga tse di masome mararo le go feta le ba ba  itlhopetsweng ke mokwaledi wa khansele le mothusa mokwaledi mo ngwageng wa madi wa 2017/ 2018  ba ne ba atswiwa ka ditlankana le dimpho e le tsela ya go ba tiisa moko.

Modulasetilo wa khansele-potlana ya Tsabong, Rre Giedon Martin mo mafokong a gagwe a tebogo o ne a lebogela botlhe ba ba amogetseng dietsele, a kaya fa e le sesupo sa ka fa ba dirang tiro ba tsentse marapo mo dinameng ka teng a bo a ba kopa go tswelela ba dira jalo le mo nakong e e tlang.

O bile a leboga barulaganyi ba letsatsi leo. BOKHUTLO