22 Feb 2018

Bana ba masiela le ba batlhoki ba sekole se sebotlana sa Khudumelapye ba abetswe dibuka ke mogwebi wa lebentlele la Madina Trading Store, Rre Mujeburehman Duste ka Laboraro.

E rile a amogela baeng kwa kabong dimpho eo, Kgosi Othusitse Mosimane, a supa gore fa motho a aba, o a bo a dira tiro e tona ka jaana le Tautona Lt Gen. Dr Seretse Khama Ian Khama a rotloetsa mowa wa go abela ba ba dikobo dikhutshwane.

O tlhalositse fa go aba e se selo sa bagwebi fela, mme a rotloetsa Batswana go aba sepe se ba nang le sone go thusa ba ba kwa tlase.

Mogokgo wa sekole se sebotlana sa Khudumelapye, Mme Ompatile Kalayakgosi o ne a tlhalosa fa khansele e sa kgone go ba fa ditlamelo ka fa go tshwanetseng, a bo a supa gore ka ntlha ya se ba ne ba patelesega go ya go kopa dithuso mo mogwebing yo, mme a tlhalosa fa a ka kgona go abela bana ba masiela le batlhoki ba le masome a marataro le borataro.

O supile fa bana ba e le ba mephato e e farologanyeng.

Le fa go ntse jalo, Rre Duste o ne a seka a akgela sepe mo kabong dimpho eo, a supa fa tumelo ya gagwe e sa mo letle go bua sepe fa a aba.

Mokhanselara wa Khudumelapye/Sesung, Rre Bokopano Tumiso, o ne a supa fa Rre Duste a ba beile motlotlo ka go reetsa selelo sa ga mogokgo, a supa fa mogwebi yoo e se la ntlha a abela batho ba Khudumelapye, a bo a supa fa a tshwanelwa ke go lebogiwa go menaganye.

Rre Tumiso o tlhalositse fa ba eletsa gore mogwebi yoo a tswelele ka ntlha ya se a se dirileng, a bo a kopa batho ba motse oo gore ba mo eme nokeng gore a tle a atlege mo kgwebong ya gagwe.

O supile  gape fa khansele-potlana ya Letlhakeng e tsere tshwetso ya gore go okediwe madi a go rekela bana dibuka gore ba tle ba gole sentle, a bo a supa fa tshwetso e e ka nna ya ama dilo dingwe tse ba ntseng ba di dira. Bokhutlo