22 Jan 2018

Moruti  wa kereke  ya Spirit  Embassy wa lekalana la  Gaborone moruti Berry  Mapoma a re kereke eo e  ema nokeng thuto ka go rotloetsa baithuti go tsaya dithuto ka tlhwafalo .

Moruti  Mapoma o buile mafoko ao ka Labotlhano jaaka kereke eo,  ene abela baithuti  ba sekolo se se botlana sa Hill School mo Lobatse bale  masome  a mabedi  le bosupa dimpho, ba ba tlhokileng lesego mo botshelong.

A  re mosimilodi wa kereke  Prophet Uebert Angel o rata thuto fela thata ka gore thuto ke bokamoso  jwa motho mongwe le mongwe  ka gore motho fa a na le thuto o kgona go itlhophela tiro e a e ratang. .  

O  boletse gore kereke e ne ya bona   go le maleba go thusa baithuti, a tlatsa ka gore puso e le nosi  ga e kake ya kgona, ka  jalo le bone e le phuthego ya Modimo ba tsibogetse seemo sa botlhoki sa baithuti ba sekolo seo sa Hill School.

O tsweletse a bolela gore ba rotloetsa baithuti bao, gore ba seka ba kotlomela maikutlo , ba itlhoboga,  go sa  kgathalesege gore  bana  le letlhoko,ka gore tshegofatso  ya Modimo    e dirwa ke batho ba dira  ditiro tse dintle tsa Modimo.

Moruti Mapoma   o boletse gape gore dilo tse dintsi tse kereke e didirang   di supa Modimo a rata baithuti le batho ba gagwe a tlatsa ka gore kereke eo   e tlisitse lorato mo sekolong seo.

Mo go tse dingwe moruti   o boleletse baithuti gore ba ka fetola Peleng   ka fa a lebiwang ka teng ga ba tlhwafalela go ithuta  , ka ke lefelo le ba tshelang mo go lone, a tlatsa ka gore kereke  e itlama go tlhokomela sekolo se sa Hill Schoo ka lenaneo  la Adopt a School.

Moruti Mapoma o boletse gore bane ba lemoga matlhoki mo sekolong seo,   mme ba nopola go abela baithuti paka ya sekolo le mephuthelwana ya dijo e e lopileng madi a a kanang ka  dikete tse di lesome le bosupa go reka dithoto tseo.

Mogokgo wa sekolo lo sa Hill School mme Mary Mohamadi, o boletse gore  sekolo seo ke sa bogologolo  senale dingwaga di masome a matlhano le bongwe a tlatsa ka gore maduo a sone ga a nametse.

Mo go   tse dingwe mme Mohamadi o boletse gore go nale batsadi ba ba sa tlhokomeleng  thuto ya bana ba bone lefa ba bidiwa ga ba  tle go utlwa se base bilediwang  a tlatsa ka gore ga ba thuse barutabana thuto ya bana ba bone.

Morutabana wa bogakolodi le tshidilo maikutlo mme Boitumelo Madome a re tiro e e sa le e simolotse mo ngwageng o o fitileng, morago ga go itemogela, bothata jwa maduo a asa tokafaleng mme ba kopa kereke ya Spirit Embassy   go tla go rapelela baithuti  mo sekolong pele ga ba kwala ditlhatlhobo tsa  bone , mme le fa go ntse jalo maduo atla a oketsegile ka lesome mo lekgolong.

Modulasetilo wa mokgatlho wa batsadi le barutabana rre Kabelo Japi o kgothaditse  kereke eo go tswelela e thusa sekolo se   mme Modimo a e okeletse, a rotloetsa  batsadi go tlhokomela bana ba bone gore batle  sekolong ba tlhapile ba tlhatswediwe banne phepa ba  je pele ga baya sekolong  gore ba kgone go reetsa ga ba rutwa. Bokhutlo