15 Jan 2018

Mopalamente wa kgaolo ya Lentsweletau/Mmopane Rre Vincent Seretse, o solofeditse fa ofisi ya gagwe e tlaa thusa go tsibogela kgang ya sekoloto sa P32 000 sa metsi a diofisi tsa kgotla kwa motsaneng wa Ditshukudi.

Erile a buisa diphuthego tsa kgotla kwa metseng ya Mahetlwe le Ditshukudu bosheng, Mopalamente Seretse a solofetsa phuthego fa a tlhaloganya seemo se bodiredi jwa koo bo iphitlhelang bo le mo go sone ka go direla mo mabakeng a go tlhoka metsi mo madirelong.

Mopalamente o solofeditse fa ba tlaa kopela thuso mo mading a P17 000 a morafe le komiti ya VDC ba kgonneng go a kokoanya go suga diatla mo go ba ba lebaneng, go thusa go bulela tiriso ya metsi kwa kgotleng fa maiteko a go batla a a tlhaelang a tsweletse.

Molapamente Seretse o iteetse legofi maiteko a go ntsha maduo a a itumedisang a dikole tsa Mahetlwe le Ditshukudu mo go di le lesome le motso tsa kgaolo ya gagwe.

Mopalamanete o ne a buwa jaana go tsibogela matswenyego a ga Kgosi Mohaladi Kokole gore bodiredi jwa ofisi ya morafe bo berekela mo mabakeng a a sa iketlang a go kgaoelwa metsi ke ba koporase ya metsi ya Water Utilities Cooperation  (WUC).

Kgosi a re bothata joo bo tlhotlheleditswe ke kago ya diofisi mo go neng ga dirwa ka metsi a kgotla ka tsholofelo ya gore ofisi kgolo ya diofisi tsa morafe e tlaa ba tswa thuso go duela metsi mme seno sa retela gotwe e santse e le kwa tlase ka maemo.

Kgosi Kokole o kaile fa bothata joo bo amile thata go nsthiwa ga ditirelo kwa ofising ya kgotla ya Ditshukudu. A re maiteko a tsweletse go leka go kokoanya madi mme ba kgonne fela P17 000 le mororo gotwe ba ka bulelwa fela fa ba kgonne P25 000 yo ba bolelang fa go le thata go mo fitlhelela.

Kgosi o tsweletse a tlhalosetsa lekalana la dikgang la BOPA gore, ba ne ba monela marulanapele go dirisa lenaneo la ipelegeneg go aga diofisi tsa seemo seo le mororo ba sa thusiwe le fa ba ne ba lekile go ipelega.

Modulasetilo wa komiti ya ditlhabololo kwa motseng wa Ditshukudu Rre Mabogo Mokone, o gateletse mafoko a ga kgosi ka go supa fa seemo sa go tswalwa ga metsi kwa diofising tsa kgotla kwa Ditshukudu go amile thata dikgang tsa go tlhabolola motse. O tsweletse a supa gore  tshwaragano ya morafe e dirile gore ba nne le phitlhelelo ya go kokoanya P17 000 le fa go sa lekana.
Kwa motseng wa Mahetlwe ba ngongoregile ka tshokolo ya go amogela ditirelo mo go dirwang ke tlhaelo ya bodiredi bo tshwana ofisi ya mokenti, molemisi le ya boipelego, ga mmogo le tiego ya go abelwa ditsha ke ba lekgotlana la kabo ditsha.

Modulasetilo wa lekgona la kabo ditsa la Lentsweletau Rre Wonder Keabilwe a re go tlhaelelwa ke ditsompelo ga ba Physical Planning ba khansele go buseditse maiteko a kabo ditsha morago ka jaana go se sepe se se ka dirwang khansele e ise e sege mealo.

 Legale Rre Keabilwe o boletse fa ba na le tsholofelo ya go rarabologa ga tiego eo ka jaana khansele e kaile fa jaanong e bone maranyane a go dira moalo, jaanong ba na le tsholofelo ya gore dilo di tlaa fefoga.

Kgosi Ontiretse Motsatsi o ledile ka go dutla ga tanka ya metsi e e nosang motse wa Mahetlwe le go tlhoka go tsibogela ga ba ba lebaneng. 

 
Mopalamenete Seretse mo loetong lwa gagwe o kopile morafe go ipaakanyetsa loeto lwa go laela Btswana ga ga Tutona Lt Gen. Dr Seretse Khama Ian Khama.

Rre Seretse yo a bileng a le tona lephata la peeletso papadi le madirelo o iteetse legofi maiteko a 100 le 81 per cent  a maduo a dikole tsa Ditshukudu le Mahetlwe mo gare ga tse di 11 tsa kgaolo ya gagwe.

A re maiteko ao ke a a itumedisang ka jaana a supa boikarabelo jwa batsadi le barutabana mo go thomamiseng kgatelepele ya seemo sa thuto mo kgaolong. BOKHUTLO