22 Mar 2017

Bontsi jwa batho ba rata merogo ya rothwe, morogo wa dinawa, le thepe jalo jalo, mme se ba sa se itseng ke gore morogo wa lephutshe le one o na le dikotla tse di nonofileng e bile di siametse botsogo.

E rile mo potsolotsong le BOPA bosheng, mongwe wa balemi ba morogo o, Mme Amogelang Seidisa, 51, o kaile fa mo Okavango ba tlotlile morogo wa lephutshe.

O kaile fa morogo o, o le bonolo go apewa e bile o sena tatso e e setlhokwana jaaka e mengwe.

‘‘Morogo wa lephutshe fa o sena go bapalwa,o ntshiwa ditlhale pele ga o segelelwa, o bo o omisiwa o sa apewa.

Se se direlwa gore o seka wa latlha dikotla ka gore o butswa ka bonako.

Mme nna ke o rata thata o sa omisiwa gonne o boruma,” Mme Seidisa a latlhela.

Mme Seidisa o tlhalositse fa go na le methale e le mentsi ya go apaya morogo wa lephutshe.

O tlhalositse fa go tswa goo-Lowe, morogo o, o ne o pharanngwa letswai le mahura, o sa tsenngwe sepe gape, mme mo dinakong tsa segompieno, batho ba tsile ka methale e e farologanyeng ya go natefisa morogo o.

Mme Seidisa o tlhalositse fa a tswakanya morogo o le tamati le diloko tse di natefisang tatso.

O kaile fa a kgona go o tsenya lerotse/lephutshe mme o nne monate le go gaisa.

Mme Seidisa o supile gore fa go sena mahura, o kgona go o tsenya mashi a lebese kana boupi jwa borotho.

O supile fa go sena beke e e fetang a sa shabe ka one.

O kaile fa theko ya nama e ile tlase mo lapeng la gagwe, e bile morogo o na le bokgoni jwa go sireletsa mmele mo malwetseng go na le nama.  BOKHUTLO