30 Aug 2016

Tautona Lt Gen. Dr Seretse Khama Ian Khama, mothusa tautona Rre Mokgweetsi Masisi, le Batlokwa go tswa South Africa e ne e le bangwe mo boidiiding jo bo neng bo tshologetse kwa motseng wa Tlokweng ka Matlhatso go tla go ema Kgosi ya Batlokwa Kgosi Puso Gaborone nokeng fa  a ne a gorosa Mmakgosi.

Morafe wa Batlokwa o o neng o tletse boitumelo jo bo seng kana ka sepe, bare Kgosi o ba tlotlomaditse ka go gorosa Mohumagadi  yo ba sa bolong go mo letela ka lebaka.

Megolokwane, meduduetso, koma, di ne di ile magoletsa fa go ne go jewa tlhako mo moletlong oo.

E rile a tswa la gagwe, Mothusa ramelao wa Afrika Borwa, Moathodi Nkabinde –Mmono, a bolelela kgosi Gaborone fa a tlotlile Batlokwa ba Kolonkwaneng baga Sedumedi le Matlapeng go tswa Afrika Borwa ka go lere ngwetsi.  

O kaile fa kgato e kgosi a e tsereng e le maleba ebile go supa fa a ka se palelwe ke sepe ka e le motho yo o nang le boitshoko.

Rrangwanaakgosi ebong kgosi Spokes Gaborone, are Batlokwa ba na le lebaka le le leele le le ka tshwarang dingwaga tse di masome matlhano ba sena mohumagadi.  Ka lone lebaka le, are e ne e le lantlha ba nyadisa kgosi.  

Le fa go ntse jalo Kgosi are ba kgonne go dira tiro e e masisi eo, ka ba ne ba ithuta.

O tsweletse ka gore, nyalo ya ga kgosi, ke selo se ba ikgantshang ka sone. 

 “Go gontle gore e re a eteletse batho pele a bo a nyetse.” Ga bua jalo Kgosi Spokes Gaborone a tlatsa ka gore go botlhokwa gore e re fa Kgosi a bua le morafe wa gagwe a kgalema a bo a nyetse.

O bile a kaya gore ere le fa ntswa go se lebaka ba mo apesitse nkwe mme ba ne ba tshwanetse ba wetsa tiro ka go mmatela mosadi.  

A re phatlha e, e ne e bonala fa Kgosi a ne a lalediwa ditiro ka go farologana ga tsone ka o ne a tsamaya a sena mopati.  

A re tseo e jaanong e tlisisitse seriti mo morafeng wa Batlokwa.

E re le fa go ntse jalo, o kopile morafe wa Batlokwa go pepetletsa mohumagadi.  

A re ba seka ba mo huralela ka a batla thuto ya setlokwa le Setswana gore a itse batsadi ka kakaretso. 

O kaile fa e tlaare kgwedi e e tlang e tlhola malatsi a le lesome ba bitse morafe otlhe wa Batlokwa ko kgotleng gore ba rolelwe mohumagadi Tanki Gaborone semmuso.

Kgosi Kgalalelo Sedumedi go tswa Letlhakeng ko Afrika Borwa fa a laya banyalani a supa fa Batlokwa ba segofaditswe ka nyalo e.  

Mme o kopile morafe gore ba godise mohumagadi, ba mo tlotle. 

O kgotlhaditse Mmakgosi go itshoka mo lelwapeng la setlokwa, a tlhokomele kgosi ka morafe ka kakaretso ba batla go ikgantsha ka ene.

Motsadi go tswa mo Tlokweng mme Onika Lekene mo boemong jwa batsadi ba Batlokwa are ba leboga Modimo ka lebaka la gore ga ba bolo go batla mohumagadi ka gore morafe ga wa bolo go batla go dira lesotla la kgosi gore go lemelwe kgosi mme kgosi e kgone go jesa morafe wa yone.  

A re seo se ka kgonagala fela fa mohumagadi a le teng ka ke ene a fang ebile a tlhokomelang morafe wa gagwe.

Mme le fa gontse jalo are ba itumetse ebile ba a leboga ka Kgosi ga a ka a baswabisa ka o sale a ba tshepisitse gore e tla are fa nako e gorogile, a ba bitse mme a dira fela jalo.

E rile a tswa la gagwe, Kgosi Puso Gaborone a bolela fa a tletse boitumelo jo bogolo.  

A re e ne yare fa a tlhongwa kgosi ka ngwaga wa 2007, a bolela fa tlotla lenyalo mme fela e le gore o emetse nako e e siameng ya a tla lerelang Batlokwa mohumagadi yo o ka tlang go batlhokomela. 

O rurifaditse gore o ne a tsaya nako go tlhopha mohumagadi, a mo sekaseka mme fa a ntse a dira jalo pelo ya gagwe ya rumaruma a lemoga fa jaanong a bone mopati

A re mohumagadi ke motho yo o pelo e e bulegileng, a le boikobo ebile a le lorato, a supa  fa se e le sone seikokotlelo sa motheo wa lenyalo la bone. 

Batlokwa ba nyadisitse kgosi ka dikgomo, madi le dimpho ka go farologana. BOKHUTLO