08 Jun 2016

Mmakaseterata wa Mahalapye, Mme Caroline Kataba, o atlholetse maloko a komiti ya ditlhabololo mo kgaolwaneng ya Tshikhinyega, dingwaga tse tharo mo kgolegelong mongwe le mongwe wa bone ka molato wa go itirisetsa madi a khansele ka boferefere.

Basekisiwa bao, ba botlhe eleng basadi e bile ba ipone molato fa pele ga lekgotla, ke Setannosa Masobe, Pelotshweu Sekgwathe, Kgomotso Sekgwathe, Mirriam Barrows le Ruth Jacob.

Kgotla e boleletswe fa e rile magareng ga kgwedi ya Motsheganong le Phukwi ngogola, basekisiwa ba utswa madi a khansele ya kgaolo-potlana ya Mahalapye ka boferefere ka jaana ba ne ba tsaya madi mo khanseleng ba re ba ya go duela babereki ba ipelegeng ntswa go sa nna jalo.

Basekisiwa bao, ba ba neng ba kopa mmakaseterata go ba sekasekela fa a ntsha katlholo ka e le bone ba tlhokomelang ba malwapa a bone e bile e le lantlha ba dira molato, ba ne ba atlholelwa kgolegelo ya dingwaga tse tharo mongwe le mongwe wa bone, mme tsa seegelwa tsotlhe fa thoko lebaka la dingwaga tse tharo ba sa dire molato wa go nna jalo.

Mmakaseterata Kataba o laetse basekisiwa bao go busetsa khansele P21 060 mo lebakeng la ngwaga, e seng jalo ba tlaa lebisiwa molato wa go tlhoka go diragatsa ditaelo tsa lekgotla. 

Mme Kataba a re e re ka basekisiwa e le lantlha ba dira molato e bile ba supa fa e le bone ba tlhokomelang ba malwapa a bone ka ba sa nyalwa, ke sone se a sekasekileng mabaka a bone a go ipobola, mme a re fa ba sa dumelane le katlholo ba ka ikuela kwa kgotleng kgolo ya ditsheko mo malatsing a le lesome le bone.

Tsheko e ne e tsamaisiwa ke mogolwane wa sepodisi sa Botswana mo Mahalapye Superintendent Isaac Mmamadi fa basekisiwa ba ne ba ikemetse ka sebele mo tshekong eo. BOKHUTLO