04 Aug 2025

Banni ba kgaolo ya Kgalagadi Borwa le Batswana ka kakaretso, ba kgothaditswe go baya tsotlhe mo go Ramasedi, ba tshephe gore o tlaa thiba phatlha ya mopalamente wa bone, Dr Micus Chimbombi, yo ba neng ba solofetse go le gontsi mo go ene go tlhomamisa gore kgaolo e tlaa tlhabologa. 

Mafoko a, a builwe ke Kgosi David Toto II wa Tsabong kwa tirelong ya segopotso sa ga Dr Chimbombi, yo o tlhokafalang a le tona wa Lephata la Lefatshe le Temo-Thuo, Dr Micus, kwa Tsabong ka Labotlhano.

Kgosi Toto o supile fa Dr Chimbombi a ne a itshupile e le motho yo o tlhaga, botlhale ebile a na le boikarabelo jo bo kwa godimo go tlhomamisa gore ditlhabololo le matshwenyego a kgaolo o a di tsibogela ka fa go tshwanentseng ka teng.

Dibui ka go farologana di mo kaile e le motho yo o bonolo, boikobo, bopelotelele, lorato ebile a sa ikgogomose ka maemo le dithutego tsa gagwe ka a ne a tsaya mongwe le mongwe ka tekatekanyo. Mongwe wa mabutswa pele a phathi ya Botswana National Front (BNF), Rre Mock Ntau o tlhalositse ka boikarabelo le bokgoni jwa ga Dr Chimbombi jo a bo supileng mo lephateng la temo-thuo. 

Rre Ntau o boletse fa go ne go se motlhofo ka a ne a melediwa mathe ke phathi ya BDP, mme yare marago ga go ipala mabala a kgaka mo go ene, a dumalana ka bongwe fela jwa pelo, a inaakanya le sepolotiki sa phathi ya BNF morago ga go tlogela kwa lekgotelng la kabo ditsha. O boletse fa Dr Chimbombi a ne a tlhongwa go nna mothusa tautona wa BNF, mme yare ka 2019 a emela ditlhopho tsa bopalamente tsa kgaolo ya Kgalagadi Borwa, a seka a atlega mme e le ba UDC, ba itoma molomo wa tlase ba dira ka gotlhe go tlhomamisa gore ditlhopho tsa 2024, Dr Chimbombi o feta ka tse di tsididi. 

Rre Ntau o boletse fa ba ne ba solofetse go le gontsi mo go Dr Chimbombi mme Modimo o dirile go rata ga gagwe.

Motshwarelela moeteledipele wa lephata la temo-thuo kwa Kgalagadi, Mme Reginah Pebe ene o tlhalositse fa Dr Chimbombi a berekile mo lephateng go simologa ka 1986 go fitlha 2015, mme a tlhatlosiwa maemo go nna mokwaledi kwa lephateng, tiro e a e dirileng ka botlhaga le boikarabelo jo bo kwa godimo go fitlha a tlogela tiro. Modulasetilo wa khansele ya Tsabong, Rre Elias Motlhanke o ne a supa fa boeteledipele jwa kgaolo bo ne bo santse ba solofetse go ithuta go le go ntsi mo go Dr Chimbombi, ka a ne a itse maitlamo a UDC thata, le go a fetisetsa kwa go ba bangwe.

Kgaitsadia Dr Chimbombi, Mme Sorophinah Hambira a re go tlhokafala ga ga Dr Chimbombi ke tatlhegelo e tona mo lelwapeng loora Chimbombi, masika le ditsala ka jaana e ne e le motho yo o tshwaraganyang le go bopaganya masika ka lorato ebile a eteleditse pele kagiso ka nako tsotlhe. Rre Kebiditswe Kgaodi mo boemong jwa barui o mo kaile fa e ne e le morui wa popota, yo ba neng ba sa ntse ba tlaa ithuta go le gontsi mo go ene. BOKHUTLO