08 Jul 2025

Borre ba gwetlhilwe go nna sekai mo setshabeng ka go nna le boikarebelo jwa go dirisa tsela ka fa go tshwanetseng, le go thusa go aga Botswana yo o babalesegileng. 

Moeteledipele wa Motor Vehicle Accident (MVA) Fund, Rre Michael Tlhagwane o buile se bosheng kwa Maun, kwa Pitsong ya Borre mme a ba kopa go ikanoka le go tlhomamisa boitsholo jo bo siameng le pabalesego ya setshaba mo ditseleng. 

Rre Tlhagwane o supile matshwenyego ka matshelo a borre a a latlhegang mo dikotsing tsa tsela, mme go ka bo go ne go sa nna jalo, a kaya fa lefatshe le latlhegelwa ke batho ba ba kabong ba le direla le ba ba neng ba ka tsoga e le baeteledipele.  A re batho ba le 346 ba tlhokafetse mo dikotsing tsa tsela ngogola mme mo palong e, ba le 271 e le borre.  Se, a re ke tatlhegelo e kgolo mo malwapeng le mo setshabeng. 

Rre Tlhagwane a re diemo tse, di tlhoka gore setshaba se bereke mmogo go di hema, a bo a kaya fa pitso e, e se go tla go bua fela, mme e le go tswa ka maano a go boloka matshelo. A re bokopono jo, bo tlaa tlhalosa sesha, gore fa gotwe rre mo Botswana go tewa motho yo o ntse jang, gore ga go tewe motho yo o kgopakgopetsanang le botshelo, go tewa motho yo o babalelang botshelo jwa gagwe le jwa ba bangwe. 

O supile fa dikotsi tsa tsela di ama itsholelo ya metse le malwapa ebile di imetsa ba ba salang boikarabelo jwa go sala ba tlhokometse malwapa. Rre Tlhagwane a re ngogola, MVA e ne ya dira ditshekatsheko (survey) ka go dirisa tsela mo go lolameng mme ga senoga gore borre ke bone ba go nang le kgonagalo ya go sa obamela melao ya tsela. 

A re tumelo le yone ke nngwe ya dilo tse di tlhotlheletsang go sa dira se se tshwanetseng mo tseleng, ka bangwe ba dumela gore rre ke motho yo o dirang dilo ka mashetla. O tlhalositse gape gore go dumela gore go nna segatlhamela masisi go supa bonna, go kotsi, a bo a tlhalosa fa ipabalelo tseleng, e sa reye puso fela, e raya botlhe. BOKHUTLO