29 Jun 2025

Dingwe tsa dilo tse Batswana ba gaopolang tautona wa ntlha wa Botswana, Sir Seretse Khama ka tsone, ke bonolo le bopelotelele.

Kgosi Ashton Sealetsa wa kgotla ya Goo-Motebejana kwa Kanye, o tlhalositse fa a ne a kopana le Sir Seretse Khama kwa Maun kwa phuthegong ya Botswana Democratic Party, kwa a neng a lemoga gore go tsena sekole kwa moseja ga gagwe go mo file temogo le tebebelope tse lefatshe leno le neng le di tlhoka.

A re le fa e ne e le kgosi, seo o ne a sa se eteletsa pele ka e bile a ne a ithola bogosi, a nna morongwa wa setshaba.

Kgosi Sealetsa o boletse fa Sir Seretse Khama a ne a le boineelo, ka e ne e a re fa go dirisiwa mafoko a a sa siamang mo sepolotiking, a ikobe, a nne le go supa gore o batla go nna moeteledipele wa sepolotiki se se letlang batho go gololesega.

Selo se, Kgosi Sealetsa o supile fa e ne e le sekai sa bopelotelele le botlhale.

O ne a gopola tiragalo nngwe e e neng e ama rre mongwe wa Mongwaketse, Rre Mokatenyane Ketshabile yo a neng a eme nokeng Kgosi Bathoeng II mo sepolotiking, e le ba kganetso ka nako ya fa kgosi a ne a tlogela bogosi go tsena mo sepolotiking.

“Ya re fa Tautona Seretse a bitsa leina la ga Rre Mokatenyane, ka go tlhoka lesego a seka a le bitsa ka fa go tshwanetseng, a mmitsa ka leina le le rayang lerotse le le sa jeweng e bile le le botlhoko. Go ne foo, morafe wa baakanyetsa taautona, kante Rre Mokatenyane ene o kgopisegile,” Kgosi Sealetsa a tlhalosa.

“Fa se se diragala, Rre Mokatenyane o ne a solofetse gore o tlaa utlwa Kgosi Bathoen a mmuelelela mme ga seka ga nna jalo. Rre Mokatenyane a ngala a rwala setilo a tlogela kgotla, morafe wa mo goa wa re, ga o kake wa dira jalo ke molato,” Kgosi sealetsa a supa.

A re go tswa foo, Sir Seretse o ne a rapela Rre Mokatenyane gore a seka a mmona molato, mme a dira jalo a le boikobo, maikaelelo e le go retibatsa seemo.

Se sengwe a re go ne go kaiwa fa e ne e a re Sir Seretse Khama a ile go lekola moraka wa gagabo, a dire jaaka o kare o itse dikgomo go fetisa badisa ba tsone, a lebe kgomo e e sa kgatlheng, morago a bitse badisa a ba botse ka yone gore e kae.

Selo se, Kgosi Sealetsa a re se ne se dira gore go lebege jaaka o ka re o itse dikgomo tsa gagabo tota. BOPA