17 Jun 2025

Borre ba le babedi ba mo diatleng tsa mapodise go ba thusa mo ditlhotlhomisong mabapi le go fitlhelwa ka letlalo la tau, meno a le mane le maroo a yone.

Mookamela mapodise a Maun, Superintendent Joseph Lepodise a re ba ne ba longwa tsebe ke mongwe ka Matlhatso, mme ba tsibogela pego eo.

A re ba ne ya go phuruphutsha kwa lwapeng la ba belaelwa kwa kgotleng ya Thito mo Maun, mme ba fitlhela dirwe tseo.

Mogolwane wa mapodise, Rre Lepodise a re borre bao ba ba dingwaga tse di fa gare ga masome a mararo le boferabobedi le masome a mabedi le borataro ba thusa ba sepodisi ka dilthotlhomiso go batlisisa gore dirwe tseo ba di tsaya kae.

A re fa babelaelwa ba ka bonwa molato, ba ka lebisiwa molato wa go fitlhelwa ka dirwe tsa diphologolo, mme ba ka atlholelwa kgolegelo ya dingwaga tse tlhano kana ba duedisiwa madi a a kana ka P5 000. BOKHUTLO