08 Jun 2025

Banni ba tikologo ya Mmalekwa kwa Kanye, ba ne ba dule letsholo go phepafatsa mabitla a bogosi jwa GaNgwaketse.

Phepafatso e ne e gogwa kwa pele ke Mohumagadi wa GaNgwaketse, Masetsibi Gaseitsewe a na le ba komiti ya mokgatlho wa maphata aa ikopantseng, e akaretsa ba khansele ya Kanye, sekole sa ithutelo booki sa Sabata le Ba mokgatlho wa Thamatlhogo Social Club. Mabitla a, go bolelwa a na le sekao se segolo sa ditso tsa Bangwaketse.

Fa a bua kwa tirong eo ka Labotlhano, modulasetlo wa komiti e e tlhokomelang mabitla, Kgosi Edward Dibeela a re phepafatso e, e tsile morago ga go kua mokgosi ga komiti e e tlhokometseng mabitla gore mokgatlho wa maphata a a ikopantseng, ka fa tlase ga ketelelo ya ga Mohumagadi Masetsibi e ba eme nokeng ka jaana mabitla a a setse a kopane ke sekgwa se se medileng mo go one.

Seemo se, Kgosi Dibeela o tlhalositse gore ga se jese diwelang ka lefelo le, e le la ditso tsa GaNgwaketse ka jalo le tshwanetse go nna mo seemong se se phepa e le go tlotla magosi le ditso tsa morafe.

Go sale foo, Kgosi Dibeela a re ga a itumedisiswe ke bangwe ba ba sa tlotleng mabitla ao, ka go a ralala mabitla, a re seo ke go tlhoka go tlotla magosi a a robetseng.

A re komiti e kile ya baya kwa mabitleng kitsiso ya gore go se ralalwe, ga mmogo le go baya tanka ya matlakala mme ga go a thusa ka sepe ka jaana dilo tse di ntshitswe. O supile gore kgang ya mabitla a a seng phepa e  ama motse otlhe ka jaana e le matshwenyego kwa dikgotleng tsa Kanye ka go farologana. 

Kgosi o kgothaditse morafe go tlhokomela mabitla otlhe fela le gore ba nne ba tsholegela taletso ya phepafatso tikologo ka bontsi ka jaana go se ope yo o ka ba phepafaletsang fa ba sa ikemele ka dinao. BOKHUTLO