04 Jun 2025

Banni ba Selebi Phikwe ba tlhalositse fa go le botlhokwa gore bobega dikgang jwa puso bo ikemele ka nosi.

Ba buile jalo ka Mosupologo mo phuthegong ya kgotla e e neng e buisiwa ke lekoko le le tlhomilweng go tswa kwa ofising ya ga Tautona go tsaya megopolo le go sekaseka melao e e leng teng le go tla ka melawana e mesha ya go tsamaisa bobega dikgang botoka.

Mme Malebogo Sejankabo a re bobega dikgang bo tshwanetse go fiwa sebaka sa go dira tiro ya bone ba sa kgopakgopediwe ke sepe. 

A re go le gantsi babega dikgang ba bewa ka fa mosing ba tshosediwa matshelo.

A re se, se diragala thata fa ba bega dikgang tse di amang bangwe bagolwane ba puso kgotsa bangwe ba ba tshwereng maemo mo ditirong ka go farologana. 

A re sepolotiki le sone se tshwanetse go emisa mokgwa wa go itshuna nko mo dikgannyeng tsa bobega dikgang.

Mme Sejankabo o supile fa ba santse ba tshwenngwa ke babega dikgang ba ba ikemetseng, a tlhalosa fa bontsi jwa nako ba kwala dikgang tse di senang boammaruri mme a tlhalosa fa se, se le borai ka se ka baka dikgotlhang mo setshabeng.

Mme Sejankabo a re, go botlhokwa go lemoga  bobega dikgang bo bongwe jo bo dira tiro e ntle thata. 

E re go ntse jalo, Mme Sejankabo o ne tlhalosa fa go tshwanetse ga dirwa molao o o sireletsang babega dikgang gore ba dire tiro ya bone ka phuthologo.

Mme Baboloki Modise le ene o ne a tlhalosa fa go le botlhokwa gore go dirwe komiti ya babega dikgang, kwa ba tlaa kopanang teng go bua matshwenyego a bone, mme a kopa gore mo komiting eo, go akarediwe baruti le dikgosi.

E rile a tswa la gagwe moeteledi wa lekoko le le tsayang megopolo go sekaseka melao e e leng teng le go tla ka melawana e mesha go tsamaisa bobega dikgang Professor Tachilisa Balule o ne a tlhalosa fa bobega dikgang e le karolo ya puso ya batho ka batho mme ba sireleditswe ke molao motheo wa lefatshe.

Professor Balule o ne a re le ntswa babega dikgang ba sireleditswe ke molao motheo, ga ba a tshwanela go gataka ditshwanelo tsa batho e bile ba tshwanetse go ba tsaya ka tekatekano.

O ne a tlhalosa fa megopolo ya banni ba Selebi Phikwe, e tlaa kopangwa le ya dikgaolo tse dingwe mme go tsewe tshwetso e e maleba. BOKHUTLO