Merwalela e gomagometsa banni ba Etsha 13 le Ikoga
16 May 2025
Merwalela e gomagometsa banni ba metse ya Etsha 13 le Ikoga kwa kgaolong ya Okavango.
Mme Lebuwang Oagetsweng wa kgotla ya Boyei kwa Etsha 13 a re metsi a monongwaga a mantsi e bile a gaufi le go tsena mo matlong a bone. Mme Oagetsweng a re ba bone seemo seo sa merwalela la bofelo ka ngwaga wa 2010, mme metsi a teng a ne a sa atumela matlo thata jaaka a ngwaga ono.
Mo potsolotsong, Molaodi wa kgaolo ya Okavango Rre William Keareng o tlhalositse fa seemo seo se bakiwa ke gore noka ya Okavango e e tsayang metsi kwa mafatsheng a Angola le Namibia e tshela. Rre Keareng a re gape ngwaga ono pula e nele e le ntsi mo Botswana bogolo jang ka kgwedi ya Hirikgong.
Rre Keareng a re pula e ntsi eo e bakile gore lefatshe le kolobe ka jalo noka e elela le mo meleng ya yone ya bogologolo. O tlhalositse fa mafelo a a nang le matshositse ele Etsha 13 le Ikoga le mafelo mangwe a ko boseja jwa noka ya Okavango. A re komiti ya dibetso tsa tholego ya kgaolo eo e malala a laotswe, go ka thusa ba ba ka amiwang ke merwalela ka ditante kgotsa go ba hudusa fa seemo se tswa mo taolong. BOKHUTLO
Source : BOPA
Author : Kedirebofe Pelontle
Location : Gumare
Event : Potsolotso
Date : 16 May 2025
Related News
10 Nov 2025
06 Nov 2025
Moroto wa esi ga o ele
05 Nov 2025
Kanye O Tlaa Tshwara Segopotso Sa HIVAIDS
05 Nov 2025
Ipelegeng ba tlaa duelwa ka maranyane
04 Nov 2025
Bodiragatsi bo ka oka baeti
04 Nov 2025