14 May 2025

Ba letlole la MVA Fund ba tshwenngwa ke ka fa bangwe ba batlhokomedi ba bana ba ba tlhokafaletsweng ke batsadi mo dikotsing tsa tsela ba dirisang madi a dithuso tsa tatlhegelo ya motlhokomedi ka teng.

Mogolwane wa MVA Fund, Mme Angela Webb, o ntshitse matshwenyego a kwa thuto-puisanyong ya dithuso tsa ba ba latlhegetsweng ke batlhokomedi ka ntlha ya dikotsi tsa dikoloi e e neng e tshwerwe kwa Palapye ka Mosupologo.

Mme Webb a re lekalana la MVA Fund le ne la emisa madi a a neng a fiwa motho fa a gobetse mo kotsing ya koloi, morago ga go lemoga fa a dirisiwa mo dilong di sele mme a ne a diretswe gore motho a duelele kalafi. A re MVA Fund e eteletsa pholo kwa pele ke ka moo gompieno ba sa ntsheng madi mme ba duelela ba ba amegileng bongaka le ditlamelo tsotlhe tse ba di tlhokang. 

Mme Webb a re kgang e nngwe e e tshwenyang ke ya batho ba ba sa ba boleleleng boamaaruri ba latola gore ba mo nyalong. A tlhalosa gore motho fa a ne a thusiwa ka madi morago ga go latlhegelwa ke monna kana mosadi fa a tsena mo lenyalong le lengwe dithuso di a emisiwa.

Fa a tlhalosa maikaelelo a thuto-puisanyo eo, mogolwane wa letlole la MVA Fund kwa Palapye Rre Mmoloki Dikago, a re ke go ruta, go gakolola le go tsibosa badirisi ka ditlamelo tsa bone. Rre Dikago a re ba tsile go buisanya ka dikgwetlho tse ba kopanang natso fa ba thusa ba dirisi ba ditlamelo gammogo le go utlwa maikutlo a badirisi ba ditirelo tsa bone le ba-na-le seabe ka kakaretso. A re maikaelelo ke go aga botsalano le ba-tsaya karolo botlhe ba ba dirang le bone go bona gore ba ka dira dilo botoka jang.

Fa a leboga, mothusa molaodi wa kgaolo ya Palapye yo gape a leng modulasetilo wa komiti ya ipabalelo tseleng ya Palapye, Rre Tshepho Mogojwe, o ne a leboga ba MVA FUND go bo ba tsisitse ditirelo kwa bathong. Rre Mogojwe a re bokopano jwa mofuta o, bo botlhokwa ka jaana bo thusa ba-na-le seabe ka kakaretso go sekaseka gore a ba itumelela ditirelo.

O kopile batsadi go bua boammaaruri le go sala melao morago ka gore go tlhoka go bolelela modiri ope nnete ke molato. Rre Mogojwe o kopile batlhokomedi ba bana go tshwara bana sentle, a tlhalosa gore tshokolo ya bana e dira gore ba seka ba gola sentle. BOKHUTLO