11 May 2025

Khansele ya Tsabong e alositse dialogane tsa ditiro tsa diatla ka lenaneo la Ipelegeng la skills Development Component (ISDC) di le masome a mararo le borataro e le tsela nngwe ya go tlhabolola lenaneo la lpelegeng le go araba selelo sa tlhaelo ya ditiro mo lefatsheng leno.

Fa a bua mo moletlong wa kaloso, modulasetilo wa khansele ya Tsabong, Rre Elias Motlhanke o ne a tlhalosa fa lananeo leo le simolodisitswe ka 2022 ka maikaelelo a go shafatsa Ipelegeng ka go rutuntsha badiri ka ditiro tsa diatla go tlhabolola matshelo a bone le gone go tokofatsa itsholelo mo lefatsheng leno.

Rre Motlhanke o ne a tlhalosa fa seo e le ditso mo kgaolong ya Kgalagadi ka e le yone kaloso ya ntlha. A re gareng ga ditiro tse ba neng ba rutuntshiwa mo go tsone di akaretsa Bricklaying, Plumbing, Panting, Tiling le Electrical Works.

O boletse fa khansele ya Tsabong ka tshwaragano le ba Construction Industry Trust Fund (CITF) ba ipela ka dialogane ka di kgonne go dira tiro e ntle ya kago ya ntlo ya mhuta wa LA2 ka dikitso tse bomme le borre bao ba di ithutileng, a tlatsa ka go re tiro eo e ne e le go tlhabolola le go nonotsha botswerere jwa bone.

Modulasetilo o ne a tswelela ka go supa fa CITF e le pilara mo ditlhabololong tsa setshaba tsa sennela ruri e bile efa dialogane tlotla le seriti mo ditirong tsa bone go itirela ba itshetsa go sa kgathalesege gore ke ba bong bofe, dingwaga le dithutego ka bangwe e bile ba sa ya gope kgakala le sekole.

A re CITF ka tshwaragano le Botswana National Productivity Centre (BNPC) le ba-na le seabe ba bangwe ba tlaa ba thusa go nna le seabe gore ditiro tse ba di dirang di bonale mo setshabeng ka go thapiwa ke maphata a puso le ba ba ikemetseng.

Modulasetilo wa khansele o ne a gatelela thata ka setlhogo sa letsatsi leo sa; Tlhabololo Dikitso - Selotlolo mo Matshelong a Sennelaruri (Skills Development - A Master Key to Sustainable Livelihood) a supa fa kaloso ya bone e le go ba bulela dikgoro go iphataphatela. “Phokoje go tshela yo o dithetsenyana,” a rialo a supa fa botshelo jwa nako eno bo rotloetsa go itirela ka diatla.

Rre Motlhanke o ne a supa fa mo nakong ya gompieno go na le ditlhopha tse tharo tse di mo ithutuntshong ka lenaneo la ISDC go aga ntlo ya mhuta wa LA1 kwa Werda le Middlepits fa bangwe mo Tsabong ba dira tsela ka go ala ditena.

Mookamedi wa lenaneo la Ipelegeng mo kgaolong, Rre Letsogile Seretse o ne a kgothatsa dialogane, a tlhalosa fa bangwe ba sa kgona mo dithutong tsa bone tse di farologanyeng mme jaanong ba filwe sebaka sa go itirela ka diatla ka dithuto tse ba di amuleng.

Rre Seretse o ne a ba gwetlha go ikopanya le ba bangwe go tlhama dikhamphani go nyeletsa lehuma ka jaanong ba tlaa bulelwa dikgoro ke ditlankana tse ba di neetsweng.

O ne a galaletsa khansele ya Tsabong ka dialogane tsa letsatsi leo, a supa fa di dirile tiro e tona e e gaisitseng tse di dirilweng mo dikgaolong tse di farologanyeng mme gape a ba kgothatsa go fetola dilo ka fa ba akanyang ka teng, go fetola dikakanyo le boitshwaro gore tiro ya bone e tle e ba solegele molemo. O ne a ba rotloetsa go tlhama le go kwadisa dikgwebo kwa CIPA.

Mo boemong jwa dialogane, Mme Pearl Motshabise o ne a supa boitumelo ka jaana ba ne ba sena madi a go ikisa dikoleng, a supa fa go ne go se bonolo mo loetong la bone mme ba kgonne ka bopelotelele le go kgatlhegela dithuto.

A re dingwe tsa dikgwetlho tse ba kopaneng le tsone ke go emela didirisiwa lobaka lo loleele mme a tlatsa ka go kgothatsa banana ba bangwe gore ba seka ba itlhoboga mo botshelong ba inaakanye le ISDC ka e na le maduo a a tsisang pharologanyo mo matshelong.

Mme Lesego Jack wa dingwaga tse di masome mararo le boferabobedi o ne a supa fa a ne a seka a dira sentle mo dithutong tsa mophato wa botlhano mme a inaakanya le ditiro tsa diatla.

O ne a supa fa jaanong a le motlotlo morago ga go amogela setlankana ka a tlaa kgona go bereka ka mashetla a itse fa dipoelo e tlaa nna tse di botoka go na le jaaka pele.

Fa a leboga mothusa molaodi mo Tsabong, Mme Boitumelo Sebele o ne a ba kgothatsa go ema ka dinao ba ipapatsa, mme a ba rotloetsa go dira ka bonokopila go thusa go ngoka setshaba. O bile a ba gakolola go tlhokomela le go somarela ditlankana ka e le boswa jwa sennela ruri.

Mo letsatsing leo go ne gape ga neelwa le badiri bangwe ba khansele ditlankana tsa go dira ka bokgabane. BOKHUTLO