08 May 2025

Makhanselara a toropo ya Selebi Phikwe ba amogetse ditlhabololo tsotlhe tse di tla a dirwang ka madi a tlhabololo dikgaolo a ngwaga ono.

Ba supile se ka Labobedi kwa phuthegong ya khansele ya toropo ya Selibe Phikwe.

Maikaelelo a phutlhego  eo e ne e le go baya pele makhanselara le bogogi jo bongwe ka go farologana jwa toropo ya Selebi Phikwe fa bontlha bongwe jwa madi bo tlaa dirisiwa mo ditlhabololong di akaretsa paakanyo ya ditsela le dipone tsa mekgwatlha magareng ga tse dingwe.

Le fa go ntse jalo, madi a a kana ka P2 million, a tlaa rekela diofisi tse pedi tsa mapalamente dikoloi go ba thusa mo ditirong tsa bone tsa letsatsi le letsatsi.

E rile ba akgela mo pegong ya madi mongwe wa makhanselara, Rre Mmopiemang Basebi wa kgaolo ya Botshabelo Bophirima o supile fa go baakanngwa ga dipone tse di suleng le go tsenya tse dingwe mo mafelong ka go farologana go le maleba ka jaana go tla thusa go lwantsha borukhutlhi jo bo tsweletseng ka go tshwenya.

A re pabalesego mo toropong e ka ngoka babeeletsi go dira dikgwebo ka go farologana, seo sa tswelela se tswakanya itsholelo ya toropo.

Rre Basebi o gateletse fa go le botlhokwa go baakanya mafelo a marekisetso a a dirisiwang ke bagwebi ba ba potlana, a re seo se tla thusa go fokotsa letlhoko la ditiro mo toropong, seemo se a supileng fa se sa jese diwelang.

Mokhanselara yo o itlhophetsweng, Rre Dimpho Mashaba o ne a re go botlhokwa go kabakanya ditiro tsa lenaneo la Ipegeleng, a re seo se tla fa babereki ba Ipelegeng botsipa ka go farologana gore ba kgone go ikemela le go itirela go ya pele.

Mme Phemelo Nthwane, yo e leng mokhanselara wa kgaolwana ya Leseding le ene o akgotse paakanyo ya ditsela le dipone mme a kopa gore go bulwe ofisi ya lekgotla la ditsheko mo toropong ya Selibe Phikwe.

A re go bulwa ga lekgotla la ditsheko go ka thusa thata go rarabolola melala ya ditsheko tsa babereki ba ba sa tseweng tsia ke bahiri ba bone mo toropong ya Selebi Phikwe.

Mme Nthwane a re le ntswa babereki ba ikuela mo bagolwaneng ka go farologana go ngomola pelo, ka jaana go sena tharabololo ya dikgang tsa bone. O ne a tlhalosa fa se se dira gore batho ba tswelele ba tshelela mo leshekereng le ntswa go twe ba a bereka. ENDS