05 May 2025

E rile ka Matlhatso kereke ya Royal City International Ministries ya abela bagodi ba Topisi ba le masome a mane le botlhano dijo le dikobo ya bo ya ba direla tee mo mosong.
Bagodi ba, e ne e le ba go simolola ka dingwaga tse masome a a ferangbobedi (80) go ya kwa godimo.
 Fa a bua kwa moletlong oo wa kabo dimpho, mohumagadi wa mosimolodi wa kereke eo ebong Apostle Dr Kabelo Barnabas mo Palapye, Mme Neo Barnabas a re bagodi ke batho ba ba tlhomphegileng mo setshabeng e bile ba tshwere botlhale le mohau o montsi ka jalo ba tshwanetswe ba tlotlwe.
A re ga go batle gore ka nako epe bagolo ba ikutlwe ekare ba lebetswe mme ba tshwanetse ba itse gore ka nako tsotlhe ba gopotswe e bile ba a rapelelwa.
Mme Barnabas a re bagodi bao ba segofetse fela thata ka Modimo o ba neetse letlhogonolo la dingwaga tse dintsi.
O ne a kopa Modimo gore a tswelele a ba boloke a bo a ba rotloetsa gore e re jaaka ba godile thata jalo, ba atamelane le Modimo.
O ne gape a ba kopa gore ba rapelele kereke ya bone gore e gole, ka e le bana ba bone ebile ba tlhoka mohau wa botsadi jo bo kana ka bone go tswelela ba direla Modimo.
Mokhanselara wa kgaolwana ya Topisi/Moreomabele, Rre Ishmael Tsiapana, o ne a lebogela dimpho tseo a supa fa tiro e e dirilweng ke kereke e le tona e bile e tlaa nna mo dipelong tsa banni le bagolo ba ba abetsweng dimpho tseo.
A re go sego letsogo le le abang go na le le le abelwang, mme kereke eo e tlaa segofadiwa.
Rre Tsiapana a re go a itumedisa go bo motse wa bone o nnile le lesego la go etelwa ke Royal City International Ministries, mme e bile ke tshegofatso ka kereke e lebiwa e le kwa Modimo o leng teng.
A re go a supafala gore kereke eo e romilwe ke Modimo ka gore go na le mafelo a mantsi a ba ka bong ba ile go abela bagodi teng, mme ba feletse ba ile kwa Topisi.
Mokhanselara a re botshelo jwa motho bo segofadiwa ka dingwaga di le masome a supa, mme go feta dingwaga tseo, e a bo e le ditshegofatso tsa Modimo ka jalo bagodi bao ba okeleditswe botshelo ka ba fetile dingwaga tseo.
O ne a kopa kereke eo go tswelela ka tiro ya bone ya go gopola batho ba ba tshelang le bone.
Rre Tsiapana o ne a akgolela banana ba kereke eo ka e le bone go supegang fa ba ne ba eteletse tiro eo pele, a re ba tshwanetse ba nne sekao mo banananeg ba bangwe e bile ba ba supegetse, ba ba rutuntshe gore botshabelo jo botona mo lefatsheng ke botshabelo jwa Modimo.
Kgosi Ezekiel Bontsi wa Topisi o ne a re se se dirilweng ke ba Royal City International Ministries se tshwanetse se nne sekao mo mekgatlhong e mengwe le batho ka bongwe ka bongwe, ba ipotse fa ba ba tshelang nabo ba tsogile, ba bo ba kgaogane le bone se ba se tshotseng fa ba tlhoka. BOPA.