02 Jan 2025

Moletlo wa Letlhabula kwa Dihalaneng o o tlaa tshwarwang kwa Kanye ka mafelo a beke ke tsela nngwe ya go tsosolosa ngwao ya Bangwaketse le go rotloetsa setshaba go tsenya letsogo mo mohameng wa bojanala. 

Mo potsolotsong le mosimolodisi wa moletlo oo, o ka one go tlaa bong go ipelelwa letlhafula la monongwaga Mme Atlang Koosaletse wa khamphani ya Monakaladi Retreats, go somarela ngwao kgatlhanong le go ka nyelela ke boikarabelo jwa botlhe.

A re ka jalo maikaelelo le moono wa moletlo ke go tsosolosa ngwao le go somarela bojanala, a supa fa ka jalo khamphani e bone go tshwanela go tshwara moletlo wa go ipelela letlhafula kwa difalaneng tsa thobo tsa kwa Kanye. Mme Koosaletse a re khamphani e bone go tshwanela go dira letlhafula kwa difalaneng ka jaana e le lefelo le le nang le bokao jo bogolo jwa ngwao le ditso tsa Ga Ngwaketse.

A re difalana tseo, tse di itsegeng ka leina la Dihalana Heritage Site ke lefelo le le ka tswelang Bangwaketse mosola mo kgwebong fa le ka sekasekelwa methale ya dikgwebo tse di ka direlwang kwa go lone. O ne a tlhalosa fa difalana tseo di ne di dirisiwa go baya thobo bogologolo e le mokgwa wa go bolokela motlha wa tlala. Mme Koosaletse o ne a tswelela ka go supa fa difalana tseo e le dingwe tsa matlotlo le meamuso ya botlhokwa ya kgaolo ya Ga Ngwaketse e bile di tshegeditse ngwao.

Fa a bua ka seabe sa ngwao mo go tsa bojanala, Mme Koosaletse o kaile fa ngwao e e amanang le difalana tseo e ka nna sengwe sa tse dintle tse di ka ngokelang batho go jela nala kwa kgaolong ya borwa. A re go re kgaolo e bo e sena bojanala jo bo tlwaelesegileng jwa diphologolo ga go e itse go tsena mo mohameng wa bojanala ka jaana e nale ditso le meamuso ya ngwao e e ka dirisiwang mo mohameng wa bojanala.

Mme Koosaletse o ne a gatelela botlhokwa jwa gore lefelo la Dihalana Heritage Site le tsenngwe mo tirisong ka jaana le setse le dirisediwa mekgwa ya botlhokatsebe le bosenyi ke bangwe mo motseng. Tebang le moletlo wa mafelo a beke, o tlhalositse gore letsatsi le tlaa nna le ditshupegetso tsa dithuto tsa Setswana segolo bogolo go dira dijo tsa Setswana, go di somarela ga mmogo le kapei ya tsone.

A re dijo di akaretsa mokoto le mehuta e mengwe ya nama, ga mmogo le majalwa a Setswana jaaka khadi di tlaa bo di le teng go gakolola Ba Gangwaketse ka medi le tlholego ya bone. Mme Koosaletse o tlhalosiste fa go tla a nna le lekgotla la borre le mo go lone go solofelwang puisano ya lekgotla la Setswana go tswa mo borareng jwa motse, mephato le mekgatlho e mengwe ya borre ka go farologana.

A re ba lephata la botsogo ba kgaolo ya borwa (DHMT) ba tlaa tsamaisa kgotla ya borre. Go sale foo, Mme Koosaletse o supile fa dikgwetlho tsa madi ka ntlha ya go tlhoka barotloetsi e le sengwe sa tse di kgopakgopetsang dipaakanyo tsa moletlo. 

A re le mororo bangwe ba solofeditse go thusa, ga ba ise ba iponatse fa e se fela lekgotla la Bathoen II Trust le le setseng le itshupile fa le tlaa ntsha thotloetso. O tlhalositse fa banana bangwe ba supile kgatlhego ya go ithaopa mo dipaakanyong jaaka go  phepafatsa kwa dihalaneng.

O supile fa le ka letsatsi la mokete go solofetsa gore go ka nna le tshologelo ya morafe ka jaana phatlalatso ya tiro eo e fitlheletse dipalopalo mo maranyaneng. Mme Koosaletse o tlhalosistse fa a solofela tshologelo segolo jang ya banana ka jaana go supega ba nale kgatlhego e ntsi ya go tla go utlwa khadi.  O rotloeditse banana ba kgaolo go ya go latlhela bofofu le go kwatabolotsa gore go ne go tshelwa jang maloba. BOKHUTLO