04 Nov 2024

Ditsela tse di golaganyang metse, di tlhofofatsa  mesepele ya batho di botlhokwa ka di aga tshwaragano fa gare ga banni ba mafelo a a farologaneng.

Mo godimo ga go kitlanya batho, di ba fa sebaka sa go gwebisanya, selo se botlhokwa mo go ageng le go nonotsha itsholelo ya mafelo a a amegang.

Ka keletso ya go nolofalediwa mosepele, banni ba Hukuntsi ba eletsa puso e ka sekegela tsebe toro eo ya bone mme ya ba betlelwa ditsela tse di ka ba golaganyang bonolo le mafelo mangwe.

Kgosi Merapelo Tshweneyagae wa Hukuntsi o boletse mo potsolotsong bosheng fa ba nale dingwaga ba itela mo pusong go agelwa ditsela tse di golaganyang motse wa bone le Tsabong, Ghanzi le Charleshill.

Kgosi Tshweneyagae a re go dira tsela e e ralalang lefelo la diphologolo la Transfrontier Park go ka fokotsa sekgala gareng ga Hukuntsi le Tsabong mme seo se ka nolofatsa metsamao ya batho le ya dithoto.

A re fa tsela eo e dikarolo dingwe tsa yone di leng lekgarapana fa tse dingwe di le motlhaba fela, e ka tshelwa sekontere batho ba Hukuntsi le mafelo a a mabapi ba ka kgona go isa leruo la bone kwa matlhabelong a a agiwang kwa Tsabong.

Ka tsela ya Hukuntsi go ya Charleshill, Kgosi Tshweneyagae a re fa e ka dirwa e ka lomaganya batho, ya letla go gwebisanya ya bo ya kgaolela ba Hukuntsi mosepele go golagana bonolo le lefatshe la Namibia le merafe ya kgaolo eo e nang le tomagano le batho ba lone.

Fa a bua ka tsela ya Ghanzi, a re go direlwa tsela e khutshwane ya go tshwaraganya mafelo oo mabedi go ka fa Hukuntsi sebaka sa go bona dipoelo mo bogwebing jwa toropo ya Ghanzi, e a boletseng fa e le kwa godimo mo go tsa kgwebo le papadisano.

Kgosi Tshweneyagae a re mo godimo ga tse tsotlhe, go arabiwa ga kopo ya bone go ka ba ungwela tse di molemo ka ditsela tse di khutshwafatsang mosepele ebile di le mo seemong se se siameng di thusa go ngoka babeeletsi.

A re fa ba ka agelwa ditsela tse, ba ka akola tse di farologaneng di akaretsa koketsego ya dikoloi tse di rwalang setshaba ga mmogo le go runya ga mhama wa tsa bojanala mo kgaolong.

Kgosi Abathene Kabatlhophane wa Zutshwa yo motse wa gagwe o lomaganngwang le wa Hukuntsi ke tsela ya lekgarapana le ene o kopile puso go ba agela tsela ya sekontere.

A re tsela ya mo nakong eno e ketefaletsa banni botshelo bogolo jang fa ba tlhoka go tsamaisa dithoto.

Kgosi Kabatlhophane a re badirelapuso le bone ba ketefalelwa ke go isa ditlamelo le ditirelo kwa motseng wa gagwe ka ntlha ya seemo sa tsela.

Mogwebi yo mmotlana kwa Zutshwa Mme Ontuetse Mantle a re boseyong jwa tsela ya sekontere bo mo gogisa bokete kwa kgwebong ya gagwe ka a reka dithoto kwa Hukuntsi.

Mme Mantle yo a foromang a bo a rekisa ditena, a re fa e ne se go duela beng ba dikoloi madi a mantsi go mo isetsa disamente kwa Zutshwa, kgwebo ya gagwe e ka bo e mo fa dipoelo tse di nametsang.

A re go isediwa dikgetsi tse di masome matlhano tsa samente kwa Zutshwa go mo lopa P3 000, madi a a supileng fa a ngotla dipoelo tsa gagwe.

Modiri kwa sekoleng se sebotlana sa Ukhwi Rre Malefo Lenkopane, a re fa tsela ya Hukuntsi-Ncojane-Charleshill e ka agwa, tshokolo ya dipalamo e e jesetsang badirisi ba tsela eo mo kgobedung e ka fetoga selo sa maloba.

A re mo nakong eno, tsela eo e dirisiwa fela ke dikoloi tse di kgolwane, selo se se ngotlileng thata palo ya dikoloi tse batho ba metse e tshwana le ya Ukhwi le Ngwatle ba ka kopang mosepele mo go tsone.

Rre Lenkopane a re badirisi ba tsela eo ba iphitlhela gangwe le gape ba tsaya malatsi go bona dikoloi go ba pega go tsaya maeto.

Bosheng fa a bula semmuso mafaratlhatlha a phetlho ya motlakase wa marang a letsatsi kwa Zutshwa, tautona wa pele Dr Mokgweetsi Masisi o ne a tsibogela kopo ya morafe wa Zutshwa ya tsela ka go tlhalosa fa puso e tlaa sekaseka kopo ya bone ga mmogo le ya ditsela tse dingwe tsa botlhokwa tsa kgaolo ya Hukuntsi. Bokhutlo