03 Nov 2024

Batswana ba sa tswa go tsenya mo pusong phathi ya Umbrella for Democracy Change (UDC) mo ditlhophong tsa setshaba tse di neng di tshwerwe Phalane e le malatsi a masome le boraro.

UDC, e e eteletsweng pele ke Tautona Advocate Duma Boko e tsaya mo go ya Botswana Democratic Party (BDP), e e nang le dingwaga di le masome a matlhano le boferabebedi e ntse e busa. UDC e fentse dikgaolo tsa boplamente di le masome mararo le borataro, Botswana Congress Party (BCP) di le lesome le botlhano, Botswana Patriotic Front (BPF) di le tlhano, BDP di le nne fa yo a ikementseng a le mongwe.

E ne yare ditlhopho di se na go wela, BOPA ya bua le Batswana ka dikeletso tsa bone mo pusong e ntsha.

Rre Jector Marambe (60) wa Ghanzi, a re ba lebogela puso e sa tswang go tlhophiwa a re o eletsa gore ba seka ba fetogela maitlamo a go tokafatsa matshelo a Batswana.

A re le fa se se ka se ke sa diragala ka ponyo ya leitlho, ba leke ka bojotlhe go thulanya ditlhogo go batla methale ya go godisa itsholelo gore ba kgone go fitlhelela dikeletso tsa Batswana mme a kopa setshaba go nna pelotelele.

“Ditlhabololo ga di batle lepotlapotla,” Rre Marambe a tlhalosa a bo a supa fa tsholofelo e le gore mowa wa therisano fa gare ga puso le setshaba, go sireletsa kagiso le thitibalo, o tswelele.

Rre Oscar Kangootui (53) wa Makunda, kwa kgaolong ya Charleshill, a re o leboga fa Tautona Boko a supile fa a tlaa buisana le De Beers, go baakanya tirisano mmogo ka teemane e le botlhokwa mo itsholelong ya lefatshe leno.

O kopile  puso e ntsha go tsosolosa matlhabelo a Botswana Meat Commission (BMC) gore theko ya kgomo e tokafale ka e le botlhokwa mo matshelong a banni ba Charleshill.

Monni was Gopong gaufi le Lobatse, Rre Maduma Motonane (46) a re o solofetse gore puso e ntsha e tlaa tokafatsa matshelo a Batswana go ya ka ditsholofetso tse e di ba di beileng pele.

A re o dumela fa letlhoko la ditiro le tlaa wela tlase ka e le nngwe ya ditsholofetso tsa bone.

Rre Motonane a re o dumela fa itsholelo ya malwapa e tlaa tokafala ka puso e supile fa e tlaa tokafatsa dituelo tsa babereki le gape gore e tokafatse ditlamelo tsa botsogo.

Lebutswapele la sepolotiki sa kganetso, Rre Pius Tumaeletse (77) kwa Tsabong a re ditso tse UDC e di dirileng ke phitlhelelo e kgolo mo sepolotiking sa lefatshe leno.

A re Botswana o itsege e le lefatshe la kagiso le thokgamo mme tota go ise go nne le go fetola puso ka seo ke sone se se ka supang sentle fa go sena dintwa ka nako ya neelano puso.

“Se se diregang se, ke tlhomamiso ya gore re lefatshe la kagiso la puso ya batho ka batho. Baeteledipele ba neelane marapo go sena dintwa mme seo ke se batho ba se eletsang,” Rre Tumaeletse a tlhalosa.

A re lefatshe leno le tswa kgakala le tumile ka puso ya batho ka batho.

A re mo pusong e ntsha, go dirilwe ditsholofetso mme go tshwanetse ga tlhoafalwa go di diragatsa gore Batswana ba nne le tshepo mo go yone.

Rre Tumaeletse a re ba tshwanetse ba tlhomamisa seriti sa mongwe le mongwe, go sena kgethololo epe mme ba bone gore matshelo a batho a a tokafala.

Mme Leaname Nkosha, mogwebi yo mmotlana kwa Selebi Phikwe a re o solofela gore puso e itebaganye le go godisa mhama wa bagwebi ba ba botlana ka gore ke bone ba tshegeditseng malwapa.

A re o eletsa fa puso e ka bula melelwane go letlelela bagwebi ba ba botlana go reka merogo kwa ntle ga lefatshe fela jaaka pele ka gore ba ne ba kgona go bona dipoelo tse di botoka go na le fa ba reka mo baleming ba mo gae.

Monana kwa Mmadinare, Mme Kelebile Pela (21) a re banana ba bantsi go feta bagolo mme puso e tshwanelwa ke go ba nonotsha gore ba kgone go tshegetsa lefatshe.

Nngwe ya tse a di eletsang ke go tlhama mebereko ,a tlatsa ka gore bontsi jwa banana ba mo malwapeng ga ba bereke, ba beile mo batsading.

A re o eletsa gape gore puso e tlhabolole mhama wa botsogo le thuto, a re tlhaelo ya melemo le dingaka e a tshwenya mme se, se ka tsenya matshelo a batho mo diphatseng fa se sa emelwe ka dinao.

Mo mhameng wa thuto a re go na le tlhaelo ya didirisiwa le dibuka tsa barutabana le baithuti mme a kopa puso go rarabolola seemo se.

Rre Oreeditse Latlhang (64), le ene e le wa Mmadinare o kopile gore puso e ntsha e kopanye Batswana ba nne seopo sengwe jaaka pele. A re Batswana ba tshwanetse go baya Botswana kwa pele ga dikeletso tsa bone.

Monana kwa Tsabong, Rre Ezekiel Tebele (35) a re go botlhokwa go neela phathi e e tseneng mo pusong thotloetso go isa popagano le itsholelo ya lefatshe kwa pele.

Rre Tebele yo e leng monana wa phathi ya BDP, a re ba latlhegetswe ke ditlhopho mme mo nakong eno go botlhokwa go amogela UDC mo pusong le go e eleletsa tse dintle.

A re Batswana ba tshwanetse ba ithute ditsamaiso tsa yone, ba amogele se e tlang ka sone le diphetogo tse di tlang.

“Re tshwanetse re e neele sebaka ka gore go busa lefatshe ke selo se se tona e bile babusi ba busa merafe e e farologaneng mme UDC e tshwanetse ya fiwa thotloetso e e lekaneng ka kitso ya gore ba basha go busa mme e bile e ntse e na le dikgwetlho tsa yone tsa phathi,” Rre Tebele a tlhalosa.

A re se se molemo ke gore ba kgonne go bopagana e le diphathi tse di farologaneng tsa sepolotiki mme popagano e, ba solofela gore e jwelelele lefatshe leno lotlhe, ba bo ba godise tirisano mmogo le mafatshe a mangwe.

Mokgweetsi wa dipalamo tsa setshaba kwa Kasane, Rre Bernard Motsumi o akgotse puso e ntsha mme a tlhalosa fa a solofetse tse dintle mo go yone.

A re o eletsa gore melawana ya tiriso ya molelwane wa Kazungula e sekasekwe ke mafatshe a Botswana le Zambia gore batho ba mahatshe a ba annywe meamuso a borogo jwa Kazungula ka go lekalekana. BOKHUTLO