28 Oct 2024

Modulasetilo wa Khansele ya Okavango, Rre Gaopalelwe Ronald o lebogile badirelapuso le makhanselara a kgaolo ya Okavango go tshwaraganela go isa ditlamelo le ditlhabololo kwa bathong, mo dingwageng tse tlhano.

Rre Ronald o buile kwa bokopanong jwa khansele bosheng, kwa a supileng fa makhanselara ba ba fentsweng mo ditlhophong tsa peo lotlhokwa ba le botlhokwa e bile batlaa tswelela ba kopa bogakolodi jwa bone.

Mothusa modulasetilo wa Khansele ya Okavango, Rre Mpoke Karapo ene o supile fa e le boikarabelo jwa khansele ya Okavango ka tshwaragano ya bodiredi le mapolotiki go netefatsa gore matshelo a batho a a tlhabololwa.

Rre Karapo o gwetlhile makhanselara ba ba tlaa fenyang ditlhopho gore ba tshwaragane go tlhabolola matshelo a batho le kgaolo ya bone le go isa Botswana kwa pele.

O bile gape a leboga bodirelapuso le makhanselara ka tiro e ba e dirileng mo dingwageng tse tlhano tse di welang.

Mokhanselara wa Qangwa-Xaixai, Rre Lelejwang Sokwe a re ka tshwaragano ya makhanselara, ba kgonne go buelela kgaolo gore khansele ya Okavango e felele e le kgaolo e e ikemetseng, selo se a reng se thusitse go isa ditlamelo gaufi le batho ba Okavango ka ditirelo ka bontsi ba ne ba di latela kwa Maun go le pele.

Rre Sokwe o lebogetse boeteledipele jwa kgaolo ya Okavango le batsaya karolo botlhe ba ba dirileng gore khansele e fitlhelele dikatlego.

Mokhanselara yo itlhopetsweng, Mme Keokeditswe Rangosa le ene o lebogelile baeteledipele ba kgaolo ya Okavango jaaka dikgosi, balaodi le ba bangwe go bo ba ne ba ba eme nokeng. BOKHUTLO