28 Oct 2024

Mothusa mokwaledi mo lephateng la Dikgaolo le Tlhabololo magae, Rre Mpho Morapedi a re mo dingwageng tse tlhano tse di fetileng, go simolola ka ngwaga wa madi wa 2019/2020 go fitlha mo nakong eno, Khansele ya Tsabong e dirisitse madi a a fetang P157 million mo ditlhabololong tsa kgaolo.

Fa a rola semmuso dingwe tsa ditlhabololo ka Labone, o tlhalositse fa mo ditirong tsa setshaba tse di neng di rulagantswe e bile di dumalanwe go dirwa ka therisano le tshwaragano ya merafe kwa metseng e e farologaneng le boeteledipele di le 307, di le 237 mo go tsone di weditswe, di le masome matlhano le bone di sa ntse di tsweletse fa di le lesome le borataro di santse di tla simololwa go dirwa.

O tlhalositse fa ditlhabololo tse, di tlhamile ditiro di le 413 tse mo go tsone go thapilweng Batswana, mme seo e le sesupo sa go fitlhelela le go diragatsa maitlamo a Tebelopele ya setshaba ya 2036 gore go se nne le ope yo o salelang kwa morago go nna le bokamoso jo bo botoka.

Mme Morapedi o supile fa ditlhabololo tse tsotlhe di diragadiwa go setswe morago dikeletso tsa setshaba ka go rerisana le bone gore go ka dirwa dife tse di tlhokafalang thata.

A re ditlhablolo tse di dirilweng, di akaretsa go baakanngwa ga matlo a badiri ba lephata la makgotla a Setswana le diofisi, go baakanngwa ga matlo a barutabana, go tshela mmu oo makgwarapana mo ditseleng tse di mo gare ga motse, ditsela tsa moalo wa ditena, kago ya matlo a batlhoki a le 237, go tsenngwa ga dipone tsa mekgwatlha le tse dingwe.

Rre Morapedi o ne a rolela ba sekole sa McCathys Rust ntlo ya borutelo ya kamore tse pedi, mantlwana a boiteketso le ya barutabana .

Rre Morapedi a re tlhabololo e tona e puso e e dirileng mo kgaolong ya Tsabong e le ya go godisiwa ga khansele ya Tsabong go ikemela, se e le go fokoletsa setshaba go latela ditlamelo le ditirelo tsa dikhansele kgakala.

Mogolwane go tswa kwa khanseleng ya Tsabong, Rre Botlhe Scotch o tlhalositse fa khansele e neetswe boikarabelo jwa go isa ditlamelo kwa setshabeng mo metseng ya selagae ka go tlhomamisa gore mananeo a puso a diragadiwa.

Rre Scotch o tlhalositse fa mananeo ao a akaretsa la Back Log in Primary School, NDP12, Ipelegeng, Destitute Housing Progamme le la CCP.

Rre Scotch a re mo ngwageng wa madi wa 2024/2025, khansele ya Tsabong e tlaa tsweledisa ditiro tsa paakanyo ya dikago tsa matlo a borutelo dikole tse dipotlana mo Kgaolong, go dira ditsela ka ditena tse di fa gare ga metse fa gape go tlaa dirisiwa madi a mangwe kwa polasing ya morafe ya thuo ya dinku tsa Swakara kwa Khawa, kago ya ofisi ya kgotla kwa Mc Cathy’s Rust le ditiro tse dingwe tsa ditlhabololo.

Mo mafokong a gagwe a tebogo, modulasetilo wa Khansele ya Tsabong Rre Hendricks Jacobs o ne a supa fa madi a a abelwang khansele a sa lekane go dira ditlhabololo, mme a kopa mothusa mokwaledi mo lephateng la dikgaolo le tlhabololo magae Rre Morapedi go baa leitlho seemo seo.

Modulasetilo o ne a gape a gakolola banana ba ba abetsweng go dira ditiro tsa setshaba go tlhabolola kgaolo, go itlama ka go dira ka natla. BOKHUTLO