27 Oct 2024

Tona wa lephata la Temo Thuo, Rre Fidelis Molao a re puso e kgathala ka matshelo a Batswana go sa kgathalesege gore ke ba kgaolo e fe.

Tona Molao o boletse fa puso e sena maikaelelo ape a go humanegisa le go sotla ope, mme e itlamile go tsaya Batswana ka tekatekano.

Rre Molao o ne a bua bosheng kwa phuthegong ya kgotla kwa Moroka, kwa kgaolong ya Bokone Botlhaba morago ga gore banni ba motse oo ba ngongoregele phimolo dikeledi e barui ba e fiwang fa dikgomo tsa bone di sena go bolawa fa di tloletse kwa Zimbabwe.

Lefatshe la Zimbabwe le tsewa le kgotlelesegile fa go itebagangwa le bolwetse jwa Thako le Molomo, ka jalo go tserwe tshwetso ya gore dikgomo tsa mono fa di tlolela teng di bolawe go itsa bolwetse go anama mono gae.

Banni ba Moroka ba boletse fa go senyega ga terata ya matlhoko a leruo le ya molelwane wa lefatshe leno le Zimbabwe, go baka gore dikgomo tsa bone di tlolele kwa Zimbabwe ka tshosologo mme ba supa fa P700 wa phimolo dikeledi a le kwa tlase fela thata.

Ba re ka motse wa bone ke mengwe ya e e gaufi le molelwane wa Zimbabwe, ba sa le ba kopile gore go dirwe sengwe go leka go kganela dikgomo go tlolela kwa Zimbabwe mme nako kgolo ke eno, ba tsweletse ka go bolaelwa dikgomo.

Banni ba ne ba bua ka fa thulaganyo ya go bolawa ga dikgomo e ba humanegisang ka teng mme bangwe ba kopa gore dikgomo di kentiwe go na le gore di bolawe fa bangwe ba supile fa kgaolo ya bone e beilwe ka fa mosing.

Rre Molao o tlhalositse fa puso e tlaa sekaseka selelo sa bone tebang le phimolo dikeledi, go bona se se ka kgonegang, a re mme fela mo bogompienong go tlaa nama go dirisiwa seelo sa P700.

Tona o boleletse banni fa tiriso ya mokento wa Tlhako le Molomo o na le ditlamorago tse di botlhoko, a supa fa o ka se siamele itsholelo ya lefatshe leno le bone barui tota ka jaana ba tla a bo jaanong nama ya dikgomo tsa bone e sa kgone go rekiswa kwa mebarakeng e e kwa ntle ga lefatshe leno.

O bile a re fa e ne e le gore puso ga e kgathale ka batho ba lefatshe leno go akarediwa le banni ba Moroka, e ka bo e sa tseye tshwetso ya go bolaya dikgomo ka le gone go baka ditshenyegelo tse di seng kana ka sepe.

Rre Molao o gwetlhile banni ba Moroka go tshwaragana le bodiredi jwa itshereletso le ba na le seabe ba bangwe, go leka go tsibogela tshenyo e e diragalang kwa terateng ya molelwane.

Tona o ba gwetlhile go sola molemo mananeo a puso e a tlhomileng go leka go ba inola mo lehumeng le gore ba kgone go itshetsa, a fa sekai ka Temo letlotlo, Thuo letlotlo le a mangwe.

Mookamedi wa lekalana la matlhoko a leruo, Dr Kefentse Motshegwa o kaile fa puso e tswa kgakala e dira maiteko otlhe a go lwantsha bolwetse kwa Tlhako le Molomo.

O kaile fa maikaelelo magolo e le go leka go dibela itsholelo le go leka go lwantsha manokonoko a bolwetse bo ka a bakelang lefatshe le tshaba ya lone.

Rre Motshegwa a re kgang ya Tlhako le Molomo e seka ya amangwa gope le sepolotiki ka seo se ka felela se bolaya itsholelo le go baka lehuma ka fa go sa tsewe ditshwetso tse di maleba, seo se ka nyeletsa thuo mo lefatsheng leno. Bokhutlo