19 Sep 2024

Dikole tse di potlana tsa metse ya Selokolela, Gasita le Gasegwagwa di amogetse ditlhako tsa sekole di le masome matlhano sengwe le sengwe go di abela bana ba ba nang le letlhoko.

Maikaelelo a mpho e, e e tswang mo go tona wa tsa mafatshe a sele ebile a le mopalamente wa pele wa kgaolo ya botlhophi ya Kanye Borwa, Dr Lemogang Kwape ke go tsholetsa seriti sa baithuti ka go kgabetsa letlhoko la bone.

Fa a rola ditlhako tseo kwa Kanye ka Labobedi, Dr Kwape o boletse fa go lemotshegile fa go tlhoka go apara sentle go ama maduo a baithuti mme a supa fa go bipa letlhoko la bone go ba tiisa moko mo ba felelang ba rotloetsega go dira botoka.

Go sa le foo, Tona Kwape o ne a gwetlha batsadi le batlhokomedi ba bana go ba ruta ditiro di akaretsa go phepafatsa le tse dingwe tsa botlhokwa tsa kwa lwapeng, a tlhalosa fa seo se ka aga boikarabelo mo baneng.

A re maduo a mantle a a sa patiwang ke go nna le boikarabelo ga a na mosola go le kalo, a supa fa go tlhoka boikarabelo go ka dira gore maduo le fa e le a a kgatlhang leitlho a seka a busetsa mong wa one le sone setshaba tota sepe se se eletsegang.

Fa a amogela ditlhako tse di neng di patilwe ke dikgetsi tse di tsenyang dibuka ga mmogo le mesangwana ya bomme, mogolwane wa lephata la thuto mo kgaolong ya borwa, Mme Barulaganyi Moseki o supile fa go bipa letlhoko la baithuti go le botlhokwa ka go dira gore le bone ba ipone e le batho.

A re go fa moithuti tse di botlhokwa tse a di tlhokang go mo fa sebaka sa go tsepama mo dithutong tsa gagwe.

Mme Moseki o ne a kopa barutabana ba dikole tse tharo tseo go thusa bana go tlhokomela dimpho tsa bone gore ba kgone go di dirisa lebaka le le rileng. Bokhutlo