19 Sep 2024

Bontsi jwa badirelapuso go tswa mo maphateng a a farologaneng mo kgaolong ya Serowe ba buile ka bongwefela jwa pelo ka mogopolo wa gore lekgotla le le ba bolokelang madi la Botswana Public Officers Pension Fund (BPOPF), le ba adime madi gore ba dire dilo dingwe go itlhabolola ba ntse ba theogetse.

Mookamedi wa BPOPF, Rre Moemedi Malindah o boleletse seboka sa badirelapuso se se neng se tsene phuthego ya tekodiso fa BPOPF e dirile dipoelo tse di nametsang go gaisa ngogola.

Rre Malindah le lekoko la gagwe ba ne ba tsharabolola dipalopalo tsa madi tse ba di dirileng mo dipeeletsong ebile ba bua fa madi a badirelapuso a sireletsegile le fa lefatshe le ka welwa ke mathata a kwelo tlase ya itsholelo.

Badirelapuso ba itumeletse seo mme ba kopa gore ka malatsi ano ba sena letseno le le botoka, ba thusiwe mo mading a bone go dira tse di ka tlang tsa ba thusa fa ba tlogela tiro ka bogodi.

Mme Tiny Selathwa, modiredi wa Serowe College of Education, o boletse fa malatsi a bone a botshelo a le makhutshwane thata, a bolela gore gantsi fela fa modiri a latlhela ka bogodi o tlhokafala a ise a je madi a gagwe a a ntseng a ipeela mme a sala a jewa ke ba ba sa a fufulelang.

  A re lekgotla le atle mogopolo wa go ba thusa ka lemmenyana lengwe gore ba itatswe menwana pele ba tlogela tiro.

  O kopile lekgotla go anamisa kitso ka fa lekgotla le dirang ka teng le gore e le badirelapuso ba itse gore babeeletsi ke bo mang le gore ba dirile bokae ka madi a bone.

  Mme Selabe Mannaesi ene  o kopile gore mo madinga a a mo letloleng, ba thusiwe go duela dibanka tse ba di kolotang gore ba seka ba nna ba jewa ka merokotso.

  Rre Kutlwano Basupi o boletse fa badirelapuso e le bone ba ba tshwereng itsholelo ya lefatshe mme ba a sotlega.

  A re melao mengwe ya lekgotla e tshwanetse ya fetolwa ba tshusiwe ka madi ba ntse ba le mo tirong eseng ba setse ba tlogela.

  Rre Basupi a re ba batla go thusiwa ka madi ao go epa didiba le go aga matlo a maroko gore e re fa ba tswa mo tirong, ba seka ba sokola e le gone ba dirang matshelo.

  Mme Kelebale Mphathi o boletse fa dikatso tsa pension di diega fela thata morago ga motho a tlogela tiro ka bogodi.

  Mme Tidimane Moeti o boletse fa kitso ka ga lekgotla e diegile thata mo bangweng ba duleng mo tirong ba sa itse ka fa lekgotla le berekang ka teng, a kopa gore ba anamise kitso eo lefatshe lotlhe mo bodireding.

Fa a ba kgwa dikgaba,  Rre Malindah a re ba tsamaisa madi a bone ka fa molaong.

  O ne a solofetsa gore dikgang dingwe tsa bone ba tlaa di fetisetsa kwa go tshwanetseng. Bokhutlo