19 Sep 2024

Maloko a mokgatlho wa Bahumagadi ba Goo-Tawana a tlotlomaditse Mme Ashley Thaba wa lekgotla la Healthy Families Foundation ka go mo abela dimpho bosheng.

Bomme bao ba ne ba mo neela tjale le tukwi e le go supa malebo mo tirong e a e romilweng ke Modimo go nonotsha le go rudisa ledula le kagiso mo malwapeng le manyalo.

Mme Thaba, gammogo le ba lelwapa la gagwe ba ntse ba le mo Maun ba ruta banni ka botlhokwa jwa malwapa le manyalo, gammogo le go abelana maele a a ka thusang malwapa le manyalo gore a itshetlele.

Ba ne ba ba ruta gape ka botlhokwa jwa go supa lorato le puisanyo mo lwapeng le gone go godisa bana sentle gore ba tsoge ba na le boikarabelo mo setshabeng.

Bahumagadi ba supile fa thuto eo e se lefela, ke ka moo ba boneng go tshwanela go supa lorato ka go neela Mme Thaba dimpho go mo tlotlomatsa.

Fa a rola dimpho tseo, Mohumagadi Lelatlhego o ne a lebogela boora Thaba tiro e ntle e ba e dirang mo tshabeng ya Botswana.

O ne a supa fa mpho eo e na le bokao jo botona, a tlatsa ka go re tjale eo e apesiwa mme yo o tserweng.

Mohumagadi Lelatlhego o tsweletse a re mo Goo-Tawana ditjale tseo di mebala e e farologanyeng, a supa fa go na le e mme a e apesiwang fa a gorosiwa, le fa a sena go nyalwa.

Modulasetilo wa khansele ya Bokone Bophirima, Rre Itumeleng Kelebetseng o ne a lebogela bontle jo bo dirilweng ke bahumagadi mme a supa fa tjale e na le bokao jo botona mo lenyalong.

A re ka Setswana, tjale ga e aparwe ke mongwe le mongwe ka jaana go dumelwa gore ke thebe e e sireletsang lelwapa kana lenyalo.

O supile fa lelwapa e le motheo o o botlhokwa mo setshabeng mme a kaya fa ka maswabi, boleng jwa malwapa bo reketla ka ntlha ya tlhabologo.

Rre Kelebetseng o lebogetse basimolodi ba lekgotla la Healthy Families Foundation go bo ba bone go tshwanela go baakanya seemo ka go bolotsa letsholo la go nonotsha le go aga malapa a motia ka dithuto.

A re dithuto tseo di tlaa thusa ba le bantsi go itsaya motlhala le go ipatlisisa ka bongwe ka bongwe gore matsapa di a tsaya kae mme ba tle ka dikarabo go nonotsha malwapa, manyalo le botsalano jwa bone.

Gape a re dithuto tseo di tlaa thusa batsadi go godisa bana sentle gore e nne batho mo setshabeng kamoso.

Kwa bofelong o ne a leboga Kgosi Tawana II go bo a bone go tshwanela go laletsa lekgotla leo mo Maun, go supa fa a kgathala ka banni e bile a eletsa go bona ba tshelela mo malwapeng a motia a a phophomang ka boitumelo. Bokhutlo