18 Sep 2024

Dipalo di supa fa borre e le bone ba ba kgokgontshang bomme le bana.

Mme selo se se gwetlhile Mohumagadi wa ga Tautona Mme Neo Masisi go itebaganya le borre go nna le seabe mo go emiseng kgokgontsho.

Mme Masisi, yo o eteletseng pele ntwa kgatlhanong le kgokgontsho ya bong o kgothaditse borre le bana ba basimane kwa Mogapinyana ka Labobedi, go tsaya kgato mo go emiseng kgokgontsho e.

A re nako e tsile gore borre ba eme ka dinao go sireletsa bomme le bana ka kgokgontsho e na le ditlamorago tse di sa siamang, tse di amang kgodiso ya bana bogolo jang ba basimane.

Mme Masisi a re bana ba ba golang ba bona motsadi wa bone wa rre a kgokgontsha wa mme, ba felela ba kgokgontsha bana ba basetsana.

A re kgodiso ya ngwana e tshwana le kago ya ntlo, mme fa e sa thaega sentle, e a wa.

Ka jalo, a re ngwana wa mosimane le ene fa a sa godisiwa sentle ga e nne rre yo o nang le boikarabelo.

O supile fa nnotagi e e nowang mo malwapeng e baka gore bana ba seka ba fiwa lorato le kgodiso e siameng ka gore batsadi ba tsaya nako e ntsi ba le mo nnotaging mme bana a bo e nna bone ba ikgodisang.

“Se ke se tsisitseng fa ke boikuelo mo go lona gore lo emise kgokgontsho ga mmogo le go nna le seabe mo ntweng kgatlhanong le kgokgontsho ya bong mo motseng wa lona,” Mme Masisi a supa.

A re jaanong ke nako ya gore borre ba sireletse bomme le bana ba basetsana, mme a gatelela gore rre o tshwanetse go tsaya karolo mo kgodisong ya bana ba gagwe, bogolo jang bana ba basimane.

“Mmogo re ka kgona. Dipatlisiso di supa fa borre ba rwele dikorone mme ke lona le ka supang dikorone tse le di rweleng ka go supa boikarabelo e bile lo ngangatlela seriti sa lona,” Mme Masisi a ba gwetlha.

Mothusa mogolwane wa sepodisi kwa Maunatlala, Assistant Superintendent Lovemore Johannes o gateletse botlhokwa jwa go sireletsa bomme le bana ba basetsana.

A re borre ba emise go tsena mo maratong le bana ba ba kwa tlase ga dingwaga tse di lesome le boferabobedi ka ba ba senyetsa isago.

Assistant Superintendent Johannes a re kgokgontsho e teng mo kgaolong, mo go setseng go na le dikgetsi tsa polao le thubetso.

A re go dira jalo go diga seriti sa borre e bile go tlogela lebadi mo go bomme ba ba kgokgontshitsweng.

Kgosi Tshito Days wa Moremi ene o supile fa ba kopane e le borre ba ipua, mme ba lemogile fa tiriso ya ditagi le yone e na le seabe mo go goleng ga kgokgontsho ya bong.

A re borre ba iphitlhela ba tsentse bomme letsogo ba le mo maibing a ditagi mme e re ba rarabologelwa ba iphitlhele ba dirile melato e metona e tshwana le polao le thubetso.

Kgosi Days o kaile fa borre ba saletse kwa morago mo go godiseng bana ba bone mo ngwana wa mosimane o golang a sena kaedi e e siameng

“Borre a re seka ra latlha bana. A re emiseng go tsenya bomme letsogo,” Kgosi Days a kgalema. Bokhutlo