18 Sep 2024

Mohumagadi wa ga Tautona, Mme Neo Masisi a re go a tshwenya go bona kgokgontsho ya bong e jweleletse le kwa dikerekeng kwa e reng fa go le thata batho ba siele teng.

O buile se kwa Kgagodi mo kgaolong ya Tswapong ka Labobedi fa a buisana le baeteledipele ba dikereke ga mmogo le bahumagadi ba dikgosi go thusa go emisa kgokgontsho ya bong e e tsweletseng ka go jwelelela mo lefatsheng leno.

Mme Masisi o eteletse pele ntwa kgatlhanong le kgokgontsho ya bong.

A re nako e tsile ya gore banni ba Kgagodi le metse e e mabapi ba eme ka dinao ba fedise kgokgontsho e ka go dira dikomiti tse di itebagantseng le go fedisa kgokgontsho mo dikerekeng le mo malapeng.

O rotloeditse ba-na-le seabe ba bangwe go ema ka dinao ba tshwaragane ba nne seopo sengwe go bua ka lentswe le le lengwe kgatlhanong le kgokgontsho.

“Mmogo re ka kgona go emisa kgokgontsho. A rotlhe re re go lekane, ” a tlhalosa jalo.

Mme Masisi o tsweletse ka go tlhalosa fa ene a tsile go gotsa molelo mo Kgagodi, ka jalo go le mo maruding a baeteledipele ba dikereke le ba-na-le seabe ba bangwe go bona gore molelo o ga o time.

A re go lekane jaanong, mme ke sebaka sa borre go ema ka dinao go sireletsa bomme le bana kgatlhanong le kgokgontsho ya bong.

Mokwaledi mo lephateng la dikgaolo le tlhabololo magae, Mme Mmamiki Kamanakao o rotloeditse go tlhangwa ga dikomiti tse di itebagantseng le kgokgontsho ya bong mo motseng ga mmogo le mo dikerekeng.

A re dikomiti ka go farologana mo motseng le tsone di nne le fa di ngunangunang ka dikgang tsa kgokgontsho teng.

Mme o ne a rotloetsa gore kgokgontsho e tshwanetse go epololwa ka medi gore lefatshe leno le tswelele ka go akola kagiso le ledula tse le itsegeng ka tsone go tswa Goo-Lowe.

Mme Kamanakao a re kereke ke yone e tshwaraganyang setshaba e bile ke yone e e reng fa go le thata, batho ba siele kwa go yone go ya go rapela Modimo.

A re fa kgokgontsho e ka jwelelela mo dikerekeng e ya go ama tshwaragano ya setshaba le lerato le le ntseng le bopagantse setshaba sa Botswana e bile e ka kgona go thuba le dikereke.

O kopile dikereke go bua ka lentswe le le lengwe kgatlhanong le kgokgontsho ya bong ka go tla ka methale ya go fedisa mmaba o mo dikerekeng gore kagiso le thitibalo di tswelele ka go rena mo lefatsheng leno.

Baeteledipele ba dikereke le bone ba ne ba supa fa ba rata e bile ba ema Mme Masisi nokeng go lwantsha kgokgontsho ya bong, e e tlhokang gore mongwe le mongwe fa a teng a dire sengwe go fetola seemo.

Baeteledipele ba dikereke ba supile fa kgokgontsho ya bong e itshupa fa e le teng mo dikerekeng mme go le gantsi e ama bomme le bana le fa kereke e tsewa jaaka lefelo le le boitshepo.

Moruti Patrick Mhaladi wa kereke ya Ntlo ya Modimo o buile a sa kgwe mathe ka seemo sa kgokgontsho mo dikerekeng le mo malwapeng.

A re bomme bangwe, bana le ba-na-le bogole ba setse ba kile ba kgokgontshiwa kwa dikerekeng mme ba ne ba tsile go ikopela dithapelo.

Mokhanselara wa Kgagodi/Diloro, Rre Thabo Koontse o rotloeditse morafe wa Kgagodi le metse e e mabapi go ema ka dinao go tsweledisa ntwa kgatlhanong le kgokgontsho ya bong, a rotloetsa gore molelo o seka wa tima.

O atlile mogopolo wa go dira dikomiti tse di tlaa bong di itebagantse le kgokgontsho mo dikerekeng le mo motseng go emisa mmaba yo o setseng a apesitse lefatshe leno kobo ka letshoba.

Rre Koontse o gakolotse gore go seka ga itebaganngwa fela le dititeo ka gore kgokgontsho e tla ka methalethale. Bokhutlo