17 Sep 2024

Mokgatlho wa Mercy Hand Foundation ba na le ba Vision Optical Centre ba abetse baithuti ba sekole sa Ditshegwane ba le masome a mane le bone ditlhako, dipensele le diraba, fa ba bagolwane ba basetsana ba abetswe le mesangwana.

Fa a rola dimpho, moeteledipele wa Mercy Hand Foundation, Rre Kabelo Rampe o supile fa a dira le ba Vision Optical Centre, ba ba mo thusang ka madi.

O tlhalositse fa a godisitswe ke barutabana ka a ne a sena batsadi, mme ya re fa Modimo a mo segofatsa, a bo a bona gore le ene a tlhokomele bana ba masiela le bana ba ba tlhokileng lesego ka go ba abela dimpho.

Mogolwane wa lephata la Thuto le Tlhabololo Dikitso kwa Gaborone, Mme Rapelang Bogatsu, a re bana ga ba tshwane ebile ga ba lekane, mme a supa fa ba bangwe ba tshabisiwa sekole ke go sa tshwane le ba bangwe.

O tlhalositse fa bana ba basetsana ba kgona go lofa sekole ka lebaka la gore ba mo setswalong mme ba sena se ba se dirisang.

A re go a lebosega go bo go na le ba ba kgonang go thusa.

Mme Bogatsu o supile fa ngwana mongwe le mongwe a na le tshwanelo ya go tsena sekole, mme fa gongwe ba paledisiwa ke mabaka a botshelo.

O lebogile ba Vision Optical Centre go tlhatlhoba bana matlho ba bo ba ba thusa ka digalase, ka bangwe ba kgona go sa dire sentle kwa sekoleng ka ntlha ya go sa bona sentle.

Motshwarelela mogokgo wa sekole sa Ditshegwane, Mme Gadifele Alstadt o supile fa sekole se tlhamilwe ka 1968 mme se alositse barutegi ba tlhwatlhwa jaaka dingaka le barutabana.

A re sekole se na le baithuti ba le makgolo a marataro le lesome le botlhano, mme mo nakong ya gompieno se sa dire sentle.

O lebogile botlhe ba ba nnileng le seabe gore tiro e atlege. Bokhutlo