11 Sep 2024

Mapodisi a Tsabong a tlhotlhomisa tiragalo e mo go yone banna ba le babedi go belaelwang ba shetse mo ntlong kwa morakeng wa Kolomape gaufi le Tsabong.

Mookamela mapodisi a Tsabong, Superintendent Christopher David, a re ba begetswe tiragalo eo ke baagisanyi kgwedi eno e supa.

O tlhalositse fa mapodisi ba ne ba ragogela kwa lefelong la tiragalo, mme ba feta ba ragosetsa banna bao kwa kokelong ya Tsabong kwa ba bongaka ba fetileng ba tlhomamisa fa ba setse ba tlhokafetse.

Supt David a re go ya ka ditlhotlhomiso tsa bone, borre bao e ne e le bana ba motho, mme ba ne ba bereka kwa morakeng oo.

O boletse fa direpa di tlaa isiwa kwa baitseanapeng ba bongaka go thusa go senola gore ke bomang, ba dingwaga tse kae gore ba batlisiwe masika.

A re go belaelwa fa baswi ba ne ba le dingwaga tse di fetang masome a matlhano le botlhano go ya kwa go tse di masome a marataro le borataro ebile ba tlholega kwa Tsabong.

Ramapodisi a re go ya ka ditlhotlhomiso, baswi ba ne ba nna mmogo mo ntlong eo e e sheleng ya bo ya lora. 

Supt David a re ditlhotlhomiso di santse di tsweletse go bona se se ka tswang se bakile tiragalo eo.

O kopile setshaba go thusa mapodisi ka se se ka tswang se diragetse go baka dintsho tseo ka ditlhotlhomiso di supa fa ba ne ba itisitse le bangwe mo Tsabong pele ga diragalo eo. Bokhutlo