11 Sep 2024

Baithuti go tswa mo mafelong a a farologanyeng ba lebogetse go fiwa sebaka sa go ithuta ka lenaneo la thuto ga e golelwe.

Mo potsolotsong le BOPA kwa moletlong wa mafatshe fatshe la go ipelela go bala le go kwala o o neng o tshwaretswe kwa Shakawe mo kgaolong ya Okavango bosheng, baithuti ba boletse fa thuto ga e golelwe e ba tlodisitse melatswana ebile e ba thusitse go tokafatsa matshelo a bone.

Mongwe wa baithuti, Mme Ngongorego Galeene, go tswa kwa Mabeleapodi, o tlhalositse fa thuto ga e golelwe e mo thusitse go itse go bala le go kwala ka Setswana le sekgowa.

Mme Galeene a re e mo thusitse gape ka go ithuta ditiro tsa diatla ka jalo a na le kgwebo ya go roka ebile a thusitswe ka mananeo a puso a tshwanang la bong le Chema Chema go atolosa kgwebo ya gagwe.

Mme Tebogo Lucas wa Pandamatenga mo kgaolong ya Chobe ene o tlhalositse fa a ne a tlogetse sekole ka lekwalo la bone ka jaana a ne a sa kgone go bala le go kwala, mme dithuto tsa ga e golelwe di mo fatlhositse.

Le ene fela jaaka ba bangwe, Mme Lucas a re go itse go bala le go kwala go mo thusitse go itse go itirela ka diatla jaaka go dira jeme le tse dingwe.

Moithuti yo mongwe, Mme Botshabelo Kanyota wa Mokgacha mo Okavango, ene o tlhalositse fa thuto ga e golelwe e mo thusitse go itse go bala le go kwala ka jalo a kgona go dirisa le mogala wa letheka.

Mme Kanyota a re o ithutile le ditiro tsa diatla jaaka go loga ditlatlana mme a re o kgona go itirela letseno go tshetsa ba lelwapa la gagwe.

Rre Foster Makgetho go tswa Gumare ene o supile fa a ithuta dithuto tsa ba tlhoka pono ka a ne a latlhegelwa ke pono ka ngwaga wa 2015, mme o tlhalositse fa dithuto di tsamaya sentle ebile a setse a itse go bala dikgwedi tsa ngwaga.

E ne ya re go le pele, molaodi wa kgaolo ya Okavango, Rre William Keareng, yo o neng a bua mo boemong ja Mothusa Tona wa Thuto o ne a supa fa lekalana la thuto ga e golelwe le supa fa puso e tsaya thuto ka tlhoafalo.

Rre Keareng a re lenaneo leo le fitlheletse diketekete tsa batho ebile e ba tlhatlheletse ka ditiro tsa diatla tse di ka fetolang matshelo a bone.

A re koketsego ya dipalo tsa batho ba ba itseng go bala le go kwala le go itirela ka diatla e botlhokwa mo go godiseng itsholelo ya lefatshe.

Mogolwane wa thuto ga e golelwe mo Botswana, Mme Malebogo Lechiile o boletse fa puso e bone go le botlhokwa go thusa bagolo le bana ba ba sa dirang  dithuto tse di kwa moding ka mabaka a a farologanyeng gore ba itse go bala le go kwala.

Mme Lechiile a re dithuto tseo di ka tsewa ke monni mongwe le mongwe wa Botswana ebile ga di duelwe.

Mogolwane wa kgaolo ya thuto ya Bokone Bophirima, Mme Veronica Mochotlhi a re kgaolo eo e boloditse letsholo go ngoka batho go tsenelela thuto tsa ga e golelwe ka dipatlisiso di supile fa dipalo tsa batho ba ba sa itseng go bala le go kwala di le kwa godimo mo kgaolong eo.

Mme Mochotlhi a re kgwetlho ke gore bontsi jwa batho ba ba sa itseng go bala le go kwala ba kwa metseng e e kgakala le ditlamelo, mme a re e le ba lephata la thuto ba bolotsa letsholo ngwaga le ngwaga go batla batho ba go nna jalo. Bokhutlo