11 Sep 2024

Banana ka bontsi ba kgobega marapo go tsena mo dikgwebong ka ntlha ya bothata jwa go dira mealo ya kgwebo.

Se se builwe ke morutuntshi wa dikgwebo, Rre Kago Keotshwaetse kwa thutuntshong ya dikgwebo ya banana kwa Palapye bosheng.

Rre Keotshwaetse o supile banana ka monwana a re ba boitseme mo go direng dikgwebo mme a ba gakolola go dirisa mananeo a a teng.

A re banana fa ba sa atlega fa ba ikopela madi a lenaneo la banana la Youth Development Fund (YDF) kana a lekalana la CEDA, ba a itlhoboga.

Rre Keotshwaetse o ba kgothaditse gore ba kope thuso kwa lephateng la banana ba sa fele pelo go fitlhelela ba atlega.

O ba rotloeditse go tsenelela dithuto tsa lekalana la Local Enterprises Authority, a tlhalosa fa di le botlhokwa fa motho a batla go simolola kgwebo.

Rre Keotshwaetse o ba rotloeditse go fetola ka fa ba dirang dilo ka teng gore ba kgone go dira dikgwebo tse di tsweletseng e bile di ntsha maduo.

A re gantsi dikgwebo di bolawa ke bokowa jwa go tshwara madi, a tlhalosa gore go botlhokwa gore madi a kgwebo a dirisiwe ka boikarabelo e bile go na le motlhala.

Rre Keotshwaetse o gakolotse banana gore ba nne le mokwalo o o supang motlhala kana tiriso ya madi gammogo le go duela dikoloto.

A re kgolo ya kgwebo e kgorelediwa ke maano, moalo wa kgwebo o o bokowa gammogo le go tlhaela kitso.

Rre Keotshwaetse a re ba kgaoganye madi a kgwebo le a bone, a ba gakolola fa dipoelo tsa kgwebo di sa jewe.

Morulaganyi wa thutuntsho eo, moruti wa Kereke ya Royal Assembly Ministries International,  Katlo Matleelane a re go botlhokwa go nna le mokatisi mo kgwebong le mo botshelong.

Moruti Matleelane a re o bone go le botlhokwa gore ba rotloetse banana ka dikgakololo tsa kgwebo gore ba tswelele mo botshelong.

A re o batla go bona banana ba ba tseneng thutuntsho e ba gatetse pele mo dikgwebong tsa bone.

O ne a supa fa ba ka kgona fela fa ba ka tsaya ka tlhoafalo dithuto le dikgakololo tse ba di filweng.

Mogwebi kwa Palapye, Mme Phatshimo Bolone a re o simolotse kgwebo ya gagwe ya madirelo a a tlhatswang, Have Five,  ka 2017 ka madi a dipolokelo. 

A re o ne a thusiwa ka lenaneo la YDF ka 2019 go godisa kgwebo ya gagwe.

Mme Balone a re go simolola kgwebo ga se selo se se bonolo, a bolela fa go tlhoka bopelotelele le boitshoko ka kgwebo e na le dikgwetlho.

A re dikgwetlho tse di a ba godisa mme se se botlhokwa ke go buisana le badirisi ba ditirelo le go ba thusa sentle. Bokhutlo