10 Sep 2024

Komiti ya nakwana ya ditshupo tsa kgaolo ya Mabutsane e ikemiseditse go wetsa ditiro tsotlhe tsa yone tse di saletseng kwa morago mo sebakeng sa ngwaga.

Morago ga go okelediwa ka ngwaga sebaka sa go rulaganya le go tsamaisa ditshupo tseo kwa phuthegong e e neng e tshwerwe kwa Mabutsane bosheng, modulasetilo wa komiti eo, Rre Johnson Ntsanyana a re sebaka se ba se filweng se lekanye gore ba tlhabolole lebala la ditshupo ka go dira tse di ka fetolang selebego sa lone.

A re dingwe tse ba yang go di dira ke go aga hoko ya dikolobe, kutla ya dikoko, go oketsa matlwana a boitiketso le go aga diofisi tsa komiti.

Rre Ntsanyana a re ba na le tsholofelo ya gore ka thuso ya barotloetsi ba bone ebong moepo wa Jwaneng, ba tlaa kgona go fenya seemo sa letlhoko la metsi a ba a tlhokang go tlhabolola lebala, a supa fa mo nakong eno ba retelelwa ke go dira sepe se se kalo ka lebaka la boturu jwa metsi go tswa kwa koporaseng ya metsi.

“Koporase e batla re reka metsi mme ebile e re a rekisetsa ka seelo sa yone se e ikemetseng se se dirang dipoelo mme boammaaruri e le gore ga re dire dipoelo dipe tse di kalo. Mme fela re na le tsholofelo ya gore morotloetsi wa rona o tlaa re thusa ka tsela nngwe go fenya seemo se,” Rre Ntsanyana a tlhalosa.

Mokwaledi wa komiti, Rre Moses Lobelo a re ba tlaa dira ka gotlhe go tlhomamisa gore ditshupo tsa kgaolo ya Mabutsane di a gola, a supa fa e tlaa re sebaka sa tlaleletso se ba se filweng se wela, ba bo ba dirile mo banni ba kgaolo ba tlaa go itumelelang.

A re maikaelelo ke gore phularong ya bone, komiti e e tlaa tlhophiwang e fitlhele ba segile tema e e bonalang, a re go wetsa ditiro tse ba di ipeileng pele ke sengwe sa tse di ka nolofaletsang komiti e e tlaa tsenang tiro go ya pele.

E ne e rile go le pele, fa ba kopiwa megopolo gore a ke komiti ya nakwana e fiwe sebaka go tswelela kana e tlhophololwe, banni ba kgaolo ya Mabutsane ba bua ka lentswe le le lengwe gore komiti e letlelelwe go tsamaisa ditshupo le mo ngwageng o o tlang.

Monni, Rre Dikatso Mokgolodi ke mongwe wa ba ba neng ba rebola gore komiti e okelediwe nako, mme o ne a supa go sa itumeleng go bo komiti eo e thamilwe ka batho ba Mabutsane fela.

Rre Mokgolodi o ne a kopa gore fa go tlhophiwa komiti ngwaga o o tlang, go tlhomamisiwe gore maloko a yone a tswa kwa metseng e e farologanyeng ya kgaolo gore go se nne le bape mo kgaolong ba dikeletso tsa bone di sa akarediweng ka ntlha ya go tlhoka kemedi mo komiting.

Kgosi Seane Gopane wa motse wa Tsonyane o ne le ene a dumalana le mogopolo wa gore komiti e okelediwe nako.

O ne a kopa gore tshwetso e e kileng ya tsewa ya gore dikgosi mo kgaolong di kolekele ditshupo P100 tlhogo ya motho, e tsosolosiwe ka e ka thusa komiti go kgobokanya madi a go tsamaisa ditshupo.

Mo kopong ya bogogi jwa kgaolo ya gore sekano sa ditshupo se kwadisiwe ka fa molaong go se sireletsa, banni ba ne ba dumalana, ba supa fa seo se tshwanetse sa potlakelwa.

Monni wa kgaolo, Rre Karabo Mokgano, o ne a dumalana le molaodi wa kgaolo, Rre Dick Kalantle fa e le boammaaruri ba sa rerisiwa sekano seo.

Le fa go ntse jalo, o ne a amogela tlhaloso ya ga Rre Kalantle ya gore morero o ne wa padisiwa ke gore nako ya go baakanyetsa ditshupo e ne e setse e le gaufi thata mme go tlama gore sekano se dirwe ka go ne go ka seke go lebege sentle gore ditshupo di tshwarwe se seyo.

Rre Mokgano o ne a ntsha mogopolo wa gore mo sekanong, go tsenngwe mokwalo o o supang palo ya metse yotlhe e e dirang kgaolo ya Mabutsane. Bokhutlo