10 Sep 2024

Banni ba Gulubane ba itumeletse pulo semmuso ya leobo la kgotla mo motseng oo.

Leobo leo, le agilwe ka lenaneo la Constituency Community Programme ka madi a a kana ka P549 293. 

Le simolotswe go agiwa kgwedi ya Phatwe ka ngwaga wa 2021 mme la wediwa Phukwi  ka 2022.

E rile a bula semmuso leobo leo, Ratoropo wa Francistown Rre Godisang Radisigo o tlhalositse fa leobo la kgotla le le botlhokwa thata ka e le lone pinagare e morafe o phuthaganelang teng go tshwara merero ya motse.

A re kgotla ke lefelo le le rotloetsang puso ya batho ka batho, ka e le gone kwa mongwe le mongwe a nnang le sebaka sa go ntsha mogopolo wa gagwe ka tshosologo, a tlatsa ka gore kgotla ke gone kwa go simolodisiwang tse di ka isang metse le lefatshe golo gongwe.

Rre Radisigo a re go tlotla dikgotla ga Batswana ke gone go thusang gore lefatshe leno le bo le na le kagiso, thokgamo tswelelopele le popagano tse e di meletswang mathe ke mafatshe a mangwe.

A re Batswana  ba ipelafatsa ka letshego la morero, a re ka jalo leobo la kgotla le fa morafe sebaka sa go kgona go tshegetsa diphuthego le merero ya motse ka tshosologo, ba sa kgorelediwe ke maemo a bosa.

Rre Radisigo a re keletso ke gore ba Gulubane ba tswelele ba tshegeditse molao le tsamaiso e e nnileng teng e sale kgotla ya bone e tlhongwa ka fa molaong ka 1979.

O ba akgoletse go bo ba kgonne tiro eo ka go bo ba ne ba ikaegile ka boithaopo, mme a re go ka nna molemo fa ba ka tswelela ka mowa oo.

Gape o supile fa mewa ya boithaopo le boipelego e le mangwe a matshego a Batswana ba ikaegileng ka one, ka jalo a tshwanetse a jwelelela go ya kwa dikokomaneng.

 Mo tekodisong ya gagwe, modulasetilo wa komiti e e neng e rulaganyetsa pulo semmuso ya leobo leo, Rre Gift Mbatisi a re e ne ya re leobo le sena go wediwa,, bogogi jwa motse le morafe ba thulanya ditlhogo go sekaseka se se ka dirwang go baakanyetsa tiro ya go le  bula semmuso.

Rre Mbatisi a re go ne ga bopiwa komiti ya maloko a le lesome le motso gore ba etelele pele dithulaganyo tsotlhe, a supa fa ba ne ba kokoanya madi ka metlhale e e farologaneng, mme gareng ga yone e le seelo sa P2 000 se se neng se lopiwa mo kgotlaneng nngwe le ngwe ya motse oo.

O boletse fa madi otlhe a ba kgonneng go a kgobokanyetsa tiro eo e le P27 000, ka jalo a leboga botlhe ba ba nnileng le seabe mo go reng tiro eo e atlege,, a tlatsa ka go gwetlha morafe wa Gulubane go tswelela ba goga ba le seopo sengwe jaaka ba dirile mo paakanyetsong ya tiro eo.

Kgosi Norah Gulubane o ne a lebogela tshwaragano e e supilweng ke morafe wa gagwe tebang le go baakanyetsa tiro e.

O ile a phophotha legetla komiti e e neng e rulaganyetsa tiro eo, a re e ne e dira bosigo le motshegare go tlhomamisa gore pulo ya leobo e a atlega.

Kgosi Gulubane a re go tsaya tsia thulaganyo ya go fetola megopolo le dikakanyo ke gone go kgontshang banni ba kgaolo eo go fitlhelela maitlamo a bone a go tshegetsa pulo semmuso ya maobo a bone.  

Kago ya leobo leo, le le nang le ofisi ya kgosi, ntlo e potlana ya diphuthego le ntlwana ya boitiketso, e ne e dirwa ke monni wa Gulubane, ebong Rre Jeoffrey Ndau, yo go tlhalositsweng a le agile ka botswapelo. Bokhutlo