10 Sep 2024

Dikgosi tsa kgaolo ya Mabutsane di amogetse ka tsoo-pedi ditiro tsa ditlhabololo tse di farologanyeng tse di dirilweng mo kgaolong ya bone mo ngwageng tse tlhano tse di fetileng.

Fa ba bua mo potsolotsong morago ga go rolelwa ditiro tseo ke bogogi jwa kgaolo kwa Mabutsane bosheng, dikgosi di supile fa ditiro tseo di tlaa tokafatsa go ntshiwa ga ditirelo mo kgaolong.

Kgosi Ketsieditswe Mooshiwa wa Kutuku, yo motse wa gagwe o agetsweng ntlo ya borutelo ya bana ba bannye, a re tiro eo e botlhokwa thata ka jaana go simolola thuto ya ngwana a sale mmotlana e le motheo o o botlhokwa wa botshelo.

A re go betla tsela ya ngwana mo thutong a sale kwa tlase ka dingwaga go tsamaelana le pitso ya ga Tautona Dr Mokgweetsi Masisi ya gore setshaba se fetole dikakanyo, a re ntle le go aga tlhaloganyo ya ngwana a santse a le mmotlana, go betla dikakanyo tse di ka isang lefatshe la Botswana.

A re ntlo ya borutelo e e agwang kwa Kutuku e tlaa thusa motse oo go nna le seabe mo maitekong a lefatshe leno a go oketsa palo ya batho ba ba nang le kitso ya go bala le go kwala.

Kgosi Mooshiwa a re o eletsa gore fa go tlhophiwa ditiro tsa ditlhabololo tse di latelang, phatlalatso ya metsi e nne nngwe ya tse di tlaa dirwang kwa motseng wa gagwe.

A re ba eletsa gape go epelwa le go gokelwa sediba se morafe o ka dirisetsang metsi a sone ditiro tsa temo-thuo.

Kgosi Mooshiwa a re ntle le metsi, ga gona ka fa banni ba motse oo ba ka akolang mananeo a puso a tshwana a Temo Letlotlo le Thuo Letlotlo.

Kgosi Dinkwetse Kesamang wa Thankane a re kwa motseng wa gagwe go nnile le paakanyo ya diofisi tsa kgotla le kwa sekoleng, a supa fa a solofetse fa go tlaa thijwa mahuti mo ditseleng.

A re le fa gone tse di neng di solofeditswe morafe wa gagwe di dirilwe, o eletsa motse oo o ka fiwa wa ba wa agelwa polase jaaka go dirilwe kwa Kanaku.

A re e re ka batho ba Thankane e le barui, fa ba ka direlwa polase ba ka iphetlhela khumo e ba ka e dirisang go tlhabolola motse wa bone le go thusa lefatshe leno go tswelela le le kwa mankalengkaleng mo mererong ya thuo ya kgomo.

Kgosi Dickson Serurubele wa Keng a re kwa motseng wa gagwe go agilwe ntlo ya bonno ya barutabana go dirisiwa lenaneo le le tlhabolotsweng la Ipelegeng.

A re le fa ntlo eo e ise e wele ka ntlha ya tiego ya didirisiwa tsa kago, e tlaa re motlhang e welang e thuse go fokotsa tlhaelo ya boroko jwa bodiredi.

A re mo nakong eno, badiri ba le bantsi ba akaretsa barutabana, baoki le mapodisi ba tlhoka matlo mme selo se se ama go ntshiwa ga ditirelo.

Kgosi Serurubele a re tiro e nngwe e e dirilweng kwa motseng wa gagwe ke go agwa sesha ga terata ya diofisi tsa kgotla.

Le fa go ntse jalo o supile fa a sa itumelele seemo sa terata eo ka go na le fa e leng kwa tlase thata teng mo dilalome di ka e tlolang bonolo.

Ditiro tsa ditlhabololo tse di dirilweng go ralala kgaolo ya Mabutsane go tloga ka 2019 go fitlha monongwaga di diragaditswe ka mananeo a puso a le mmalwa a akaretsa la Ipelegeng, la go dira ditiro tse di saletseng kwa morago kwa dikoleng, la madi a dikgaolo tsa botlhophi ga mmogo le a kago ya matlo a batlhoki le a banni ba dikgaolo tse di kgakala le ditlamelo la RADP.

Ditiro tse, tse di akaretsang go agwa ga matlo, go baakanngwa ga dikago, kgokelo ya motlakase, go gopiwa ga ditsela le go dira ditsela ka ditena, kepo le kgokelo ya didiba, le yone tota kago ya dikole tse disha di dirilwe ka maikaelelo a go tokafatsa matshelo a banni le go tokafatsa fa ba felwang teng ditirelo ka go farologana. Bokhutlo