14 Aug 2024

Rre mongwe wa dingwaga tse di fa gare, wa motse wa Motokwe kwa kgaolong ya Kweneng, o tlaa lebisiwa molato wa go baka loso ka go kgweetsa botlhaswa. 

Mo potsolotsong le BOPA, mookamela mapodisi a Mabutsane, Superintendent Batani Lehuma, a re rre yoo o tlaa isiwa fa pele ga lekgotla la ga mmakaseterata mo bogaufing morago ga gore a bake loso lwa rre yo o dingwaga tse di fa gare kwa motseng wa Mahotshwane beke e e fetileng. 

A re moswi, o ne a tlholega kwa Sekoma mme a ne a bereka kwa merakeng ya Mahotshwane. O ne a tsamaya ka kara ya ditonki a le nosi fa a thulwa ke mmelaelwa kwa morago. A re tiragalo eo e diragetse mo tseleng e e tsenang mo motseng e tswa kwa merakeng ka lotlatlana, gareng ga nako ya bosupa le ya borobabobedi. 

“Morago ga go begelwa tiragalo eo, o ne a isiwa kwa kokelwaneng ya Mahotshwane kwa go fetileng ga rurifadiwa fa a tlhokafetse. 

Dipatlisiso tsa mapodise di supa fa kotsi eo e bakilwe ke go tlhoka kelelelo ga mokgweetsi yo o neng a tswa kwa morago,” Superintendent Lehuma o tlhalositse jalo. 

O boletse fa moswi a tlaa bolokwa kwa gagabo kwa Sekoma mafelo a beke, morago ga go wetsa ditlhatlhobo tse maduo a tsone a solofetsweng mo bekeng eno.

A re mmelaelwa o ne a tshwarwa lone letsatsi leo go thusa ka ditlhotlhomiso mme a gololwa, ka jalo a letetse go lebisiwa molato kwa lekgotleng la ga mmakaseterata.

 BOKHUTLO