14 Aug 2024

Bomme ba kgothaditswe go itse boleng jwa bone ka seo se ka ba kgontsha go tsaya karolo e e matshwanedi mo setshabeng.

Mokgothatsi e bile e le moitseanape wa tshidilo maikutlo Rre Thabiso Bogopa o buile se kwa moletlong wa go ipelela letsatsi la bomme le le neng le rulagantswe ke ba Avani Hotel bosheng. 

Rre Bogopa o tlhalositse fa bomme mo Botswana ba aga malwapa kgotsa ba tshwerwe boikarabelo jwa mo malwapeng, ka jalo ba tshwanetse ba seka go dumela go ka letlelela gore ba tsewe motlhofo

O kaile fa bomme ba le ditswerere tsa go direla malwapa a bone go dira bontle jaaka go inaakanya le metshelo. 

Rre Bogopa o kgothaditse bomme go tlhaloganya gore ba tshwanetse le go itse gore ba-na- le seabe go ithuta dilo tse dintsi mme ba arogane le setshaba kitso ya bone.

Fa a fa sekai ka Tirelo Setshaba ya ntlha, a tlhalosa fa e ne e le mashetla ka ene e ruta bana go itse fa ba na le karolo ya go direla setshaba le gone go dira pharologanyo mo matshelong a batho. Mongwe wa bomme ba ba dirang pharologanyo mo setshabeng ka go lwela ditshwanelo tsa ba ba kgokgontshitsweng ka bong e bile e le mongwe wa ba ba kileng ba kgokgontshiwa, Mme Malebogo Molefe, a re bomme ba tshwanetse go lwantsha kgokgontsho mme a gakolola mongwe le mongwe yo o kgokgontshiwang go ntsha lentswe.

O kgadile kgokgontsho ya bana e e dirwang ke borre ba ba bolayang bomme a re e lwantshiwe. 

Mme Malebogo Busang yo o supileng fa a fentse bolwetse jwa kankere o kopile bomme go itlhokomela, ba seka ba itapatepanye le ope mo botshelong. 

A re go botlhokwa go ithata le go ijesa monate.  BOKHUTLO