13 Aug 2024

Badirelapuso ba ba direlang kwa Tshimoyapula ba supile mowa wa kutlwelobotlhoko ka go agela  batlhoki mo motseng oo, matlo a le boferabobedi.

Ka Labotlhano ba ne ba kopanye  le badiri ba maphata otlhe a puso  go tswa kwa Serowe go tla go ba thusa go feleletsa matlo ao. 

Mme Godiramang Mpapho-Kgano a re mogopolo o wa go aga matlo o simolodisitswe ke Sergeant Stephen Pule. 

A re Rre Pule o ne a tlhalosa  gore badirela puso ba tshwanetse ba supa metlhala ya bone fa ba tswa mo kgaolong ba ya go berekela go sele. 

Mme Mpapho-Kgano a re ba ile ba dumalana gore jaaka motse wa bone o na le dikgotlana di boferabobedi ba tshwanetse go aga ntlo mo kgotlaneng nngwe le nngwe.

A re ka Modimo o seke o latlha, ba kgonne go dira jalo ka dithuso tse di neng di tswa mo bodireding jwa puso . 

Mme Mpapho-Kgano a re ba tlhophile letsatsi la Labotlhano go tla go feleletsa  le go dira fa go tlhaetseng teng ka thuso ya bangwe ka bone go tswa Serowe.

A re ba kgonne go aga matlo ao  ka thuso ya  dikhampani tse di farologanyeng di akaretse Dennis Motors, Builders World le Puma. 

Mme Mpapho-Kgano o ile a supa gore ka nnete e le batho ba  Tshimoyapula le bodiredi ba itumeletse tirisano mmogo e ba e bonang mo tirong e.

A re tsholofelo ke gore Motlotlegi Tautona Dr Mokgweetsi Eric Keabetswe Masisi o tlaa tla go bula matlo ao semmuso kgwedi eno e  le malatsi a le lesome le botlhano.

A tswelela ka go kopa badirela puso go tsweledisa mowa wa kutlwelo botlhoko le go lemoga ba ba tlhokileng  lesego mo setshabeng.

Mongwe wa ba ba  agetsweng ntlo Mme Oreganeditse Makgetho yo o dingwaga di masome mane le boferabongwe, a re o itumetse thata ka le e ne a dumela gore o tlaa nna le seriti. 

O ne a  leboga badirela puso tiro e ntle e ba e direng.Bokhutlo. BOPA