13 Aug 2024

Mapodisi a Middlepits a tlhotlhomisa tiragalo e mo go yone ngwana  wa ngwaga ee le nngwe a fitlhetsweng a tlhokafetse morago ga go wela mo kgamelong ya metsi kwa Gakhibana bosheng. 

Mo potsolosong le BOPA ka Mosupologo mookamela mapodisi a Middlepits, Superintendent Kebadire Mmopi, o tlhalositse fa mapodisi ba begetswe tiragalo e mo bekeng e e fetileng mme ba ragogela kwa tiragalo e diragatseng teng kwa ba fetileng ba ragosetsa ngwana kwakokelong  ya Tsabong.

A re ka go tlhoka  lesego ba bongaka ba fetile ba tlhomamisa fa ngwana a setse a tlhokafetse. 

Superintendent Mmopi o ne a tlhalosa fa ngwana a ne a na le mmaagwe mo lwapeng, yo o neng a tlhatswa ka nako ya tiragalo.  

Go belaesega ngwana a ne a gagabela kwa kgamelong ya 2L e e neng e tletse metsi mme a wela mo go yone. 

Mookamela mapodisi a Middlepits a re ntsalae mmaagwe ngwana ke ene a begileng ka seemo seo morago ga go bona ngwana fa a ne a ile go gelela metsi. 

Superintendent Mmopi o boletse fa serepa se ne sa romelwa kwa kokelong ya Princess Marina kwa Gaborone ka Mosupologo go tlhatlhojwa ke ba bongaka fa ditlhotlhomiso tsa mapodisi tsone di sa ntse di tsweletse. 

Mookamela mapodisi o ne a gakolola batsadi go ela tlhoko bana fa ba na le bone mo lwapeng gore a ba sireletsegile ka nako tsotlhe go itsa ditiraglo tsa mofuta o

O ne a supa fa tiragalo e, e le ya ntlha monongwaga. BOKHUTLO