13 Aug 2024

Botswana o lebanwe ke dikgwetlho tse di bokete tse di ka kgonwang fela ke thapelo, ka jalo se, se tlhoka seabe sa dikereke. 

Tsatsi le letsatsi metswedi ya dikgang e bega ka dipolao tsa bana, dipetelelo le go ketekwa ga bomme, diemo tse di tshwenyang mo lefatsheng leno. Tona wa Thuto le Tlhabololo Dikitso, Motlotlegi Dr Douglas Letsholathebe o buile se kwa moletlong wa go kokoanya madi a kago ya kereke ya The Followers of Jesus Christ Church kwa Senyawe ka Matlhatso. Dr Tsholathebe, yo gape eleng Mopalamente wa Tati Botlhaba a re diemo tse di batla Jeso ka sebele.

A re puso ya Botswana e lemoga seabe se se dirwang ke dikereke mo go ageng boitsholo le mekgwa ya setshaba. 

O gwetlhile maloko a kereke eo le tse dingwe go tswelela ka tiro  e ntle,  go lepalepana le mekgwa e e maswe e e setseng e jweleletse mo lefatsheng.

“Ka bomadimabe, tiriso botlhaswa ya diritibatsi, dipolaano, petelelo le kgokgontsho ya bong e setse e le selo modiro mo setshabeng,” Dr Letsholathebe a ba se, a tlatsa ka gore kereke ke yone e e ka thusang gore batho ba tshabele kwa go yone fa go le bokete.

Dr Letsholathebe o ba gakolotse gore letsholo la ga Motlotlegi Tautona Dr Mokgweetsi Eric Keabetswe Masisi la ReSet and Reclaim Agenda le gwetlha gore go fetolwe ka fa go dirwang dilo ka teng mme a leboga kereke ya The Followers of Jesus Christ go ikemela ka dinao ka go ikagela kereke e ba tlaa thusang bana ba ba dirisang ditagi.

O tlhalositse fa dikole di aparwe ke seru sa bana ba ba dirisang diritibatsi, ka ba isiwa dikoleng tse ba nnang kwa go tsone mme ba bowe  e le batho ba se le ba sa bone batsadi ba bone ka sepe, seemo se a reng se tlhoka Modimo.

Tona Letsholathebe o ba kopile go simolola mananeo a go etela dikole, go buisa bana ka nako ya thapelo ya mo mosong ka tiriso botlhaswa ya diritibatsi, nnotagi le go keteka ba bangwe.

Bishop Orbed Takobana o supile fa moono e le gore ba tswe kwa ditlhareng, ba age kereke gore bana ba ba golang ba obame fa go sireletsegileng. A rotloetsa setshaba go ruta bana poifo Modimo le go ba isa kwa dikerekeng ka di aga setshaba go nna se se itshekileng.

Moruti California Mahlaya o tlhalositse gore e tlaare kago e sena go wela, kereke e thuse ba ba amegileng ka nako tsa dibetso tsa tlholego.

O tlhalositse fa madi otlhe a a tlaa kgobokanngwang a ya go dirisiwa mo kagong ya kereke e seng sepe gape. 

BOKHUTLO