12 Aug 2024

Maikaelelo a Banka ya First National Bank Botswana Foundation ke go fetola matshelo a setshaba se ba direlang mo go sone ka go busetsa bontlha bongwe jwa dipoelo tsa banka eo mo go bone.

Ka jalo FNBB Foundation e ne  ya simolodisiwa ka 2004 morago ga go sekaseka dikgwetlho tse di amang setshaba mo metseng le dikgaolo tse di farologanyeng.

Moeteledipele wa kgaolwana ya borwa mo bankeng eo, Mme Onkemetse Montsheki o buile se, kwa sekoleng se se botlana sa Kisa, mo kgaolong ya Tsabong, jaaka ba ne ba abela baithuti dibeke tsa sekole tse di dirisang marang a letsatsi e le tsela nngwe ya go rotloetsa le go tokafatsa maduo mo dikoleng jaaka e le maitlamo a bone.

A re go simologa ka ngwaga wa 2015 ba ne ba beela kwa thoko P500 000 ngwaga le ngwaga go thusa le go tlhabolola matshelo a baithuti ba ba kgakala le ditlamelo, le gone go tokafatsa maduo mo dithutong tsa bone, a supa fa go fitlha mo nakong ya gompieno ba setse ba dirisitse madi a  a fetang P3m.

Mme Montsheki o ne a tswelela ka go tlhalosa fa dimpho tse ba di abetseng sekole sa Kisa di akaretsa beke ya sekole e e nang le marang a letsatsi le lebone le le tlaa ba thusang go bala fa go le bosigo.

Le fa go ntse jalo o boletse fa gape FNBB Foundation e itlamile le go itebaganya le dipilara tse thataro tse e leng tsone di ba kaelang ka fa ba thusang ka teng mo ditirong tsa setshaba.

Mme Montsheki o ne a tlhalosa fa dipilara tseo di akaretsa ya Banana, go ba thusa go tokafatsa matshelo a bone ka bangwe ba aparetswe ke letlhoko la ditiro morago ga go fetsa mo dikoleng tsa ithutelo ditiro.

 O supile fa gape ba rotloetsa le go tokafatsa thuto mo dikgaolong tse di kgakala  le ditlamelo gore ba kgone go phadisana le dikole tse di mo ditoropong ka maduo a a itumedisang.

A re dingwe tse ba  thusang mo go tsone di akaretsa botaki, go rotloetsa le go tsosolosa ngwao le go thusa badiragatsi go itirela letseno le gone go itlhamela ditiro tsa sennela ruri gore mo isagong ba kgone go ikemela ba le nosi mo go tlhabololeng le go tokafatsa matshelo a bone gareng ga tse dingwe.

Mogokgo wa sekole sa Kisa, Mme Motshidiemang Moepi o ne a tlhalosa fa sekole seo se amogetse baithuti ba le 84, barutabana ba le lesome le badiri ba bangwe ba le barataro.

Mme Moepi o ne a supa fa ba tshwaraganye le komiti ya batsadi le barutabana selo se se thusang thata mo go tokafatseng maduo a baithuti mo sekoleng seo.

Mogokgo o ne lebogela dimpho tseo, a supa fa di tlaa tlisa pharologanyo mo maduong go ya pele mo sekoleng seo.

Fa a amogela baeng Kgosi Matshidiso Babeile wa Kisa o ne a supa fa ba amogela dimpho tseo ka atla tsoo-pedi mme a gwetlha dikompone tse dingwe tse di ikemetseng go tsaya malebela mo go FNBB Foundation ka go nna le seabe mo thotloetsong ya thuto bogolo jang mo dikoleng tse di kgakala thata le ditlamelo.

Kgosi Babeile o ne a rotloetsa batsena moletlo oo, go ema nokeng banka ya FNB ka go adima le go baya madi jaaka e tlaa re mo bogaufing ba bo ba atametsa ditirelo tsa bone gaufi kwa Tsabong.  BOKHUTLO