12 Aug 2024

Balemi barui ba rotloeditswe go dira ka natla go bona gore temo thuo ga e wele fa fatshe ka go itepatepanya le phetogo ya loapi.

Fa a bua kwa letsatsing la go ipelela disupiwa tsa temo kwa Goo-Tau mo kgaolong ya Palapye bosheng, Mothusa Tona wa Dikgaolo le Tlhabololo Magae, Motlotlegi Setlhabelo Modukanele a re dipaka ga di tshwane le mo dinakong tse di fetileng tse dipula di neng di na sentle e bile balemi ba beile thata mo go tsone ba kgona go roba thobo e e nametsang.

A re mo malatsing ano dipula di boutsana, mogote o kwa godimo e bile dijwalo di a babalelwa, ka jalo balemi ba tshwanetse ba thuse dijwalo ka go somarela bokgola kana go lema temo ya tshomarelo.

O kgothaditse balemi go lema dijwalo tse di bogadi bo gaufi le gone go tlhokomela masimo a bone. Rre Modukanele o ne a gape a kopa balemi go kwadisa ditlhopha tsa bone semmuso.

Le fa go ntse jalo, Rre Modukanele o ne a akgolela balemi ba kgaolo ya Palapye go bo ba bone go tshwanela gore ba tshware letsatsi la disupiwa tsa temo ka le tshwaraganya balemi go tla go iteisanya borathana ka disupiwa tsa bone.

A re letsatsi leo gape le thusa balemi go neelana maele ka temo gore di tswa temong e nne tsa maemo a a kwa godimo.

O boletse fa puso, ka mananeo a a a farologaneng, e rotloetsa balemi go ntsha dijwalo tse dintsi e bile di na le boleng ka jalo e ntshitse mananeo a Temo Letlotlo, Thuo Letlotlo le la Integrated

Accelerated Subsidy (IAS) le le akaretsang balemi ba merogo le maungo. A re se ke maiteko a go ntsha Batswana mo lehumeng le gone go thusa mo tlhaelong ya dijo.

O supile fa lephata la dijwalo le kgaogantse dikgaolo go ya ka boleng jwa mebu ya tsone le dijwalo tse di ka lemiwang mo dikgaolong tseo.

Rre Modukanele a re go supafetse fa mmu wa kgaolo ya Palapye o siametse dijwalo di tshwana le dinawa, mabele, manoko le magapu le masika a tsone.

A re mo kgaolong ya Palapye mo pakeng ya temo ya 2022/23 ditema tsotlhe tse di lemilweng ka lenaneo la ISPAAD e ne e le diheke 10 015.40 mme temo ya 2023/24 ka lenaneo la Temo Letlotlo ditema tsotlhe di ne di le 3 723 di lemilwe ke balemi ba le 1 567.

Ka jalo, Rre Modukanele o ne a supa fa mo ngwageng ono wa temo go ne go sena pula mme temo e le kwa tlase ntswa bangwe ba bone sengwe.

A re ba ba boneng sengwe ke ba ba neng ba sala metlhala ya temo e e tlhabolotsweng morago.

O ne a supa fa Palapye e le nngwe ya dikgaolo tse di ntshang thobo e kgolwane ya merogo le maungo kwa polaseng ya Tuliblock e e dirisang temo ya nosetso. BOKHUTLO