12 Aug 2024

Badiredi ba sekole se sebotlana sa Thabala ba abetse Rre Gaolathe Abae yo o dingwaga tse di masome mabedi le bone ntlo .

Fa a bua kwa moletlong wa go aba ntlo eo bosheng, Mogokgo  wa sekole seo Mme Sheilah Rammekwa  a re e ne ya re ka ngwaga wa 2019 ba lemoga fa go na le ngwana mongwe  yo a nang le letlhoko la boroko.

A re ka nako eo ngwana yoo,  yo a neng a le dingwaga tse di lesome le bosupa (17) o ne a dira lekwalo lwa botlhano, mme a le maitseo thata. Mme Rammekwa o kaile fa e le bodiredi jwa sekole seo ba ne ba gwetlhega go thusa ngwana yo. A re ba ile ba ithulaganya go dira mogwanto o o duelelwang.

Mme Rammekwa a re erile ba sena go dira mogwanto oo ba kgona go tshela slab ba bo ba emisiwa ke segajaja sa COVID- 19.

A re  e rile ka ngwaga wa 2022 ba tsweledisa mosepele wa bone wa go bona gore ba aga ntlo eo jang. Ba ile ba kopana le ba mokgatlho wa metshameko ya sontaga wa Easy le ba khampani ya Galchiz go tshwaraganela tiro e go fitlhelela e fela.

Modulasetilo wa Easy Rre  Goitse Moleele a re ba kgonne se, ka ba ne ba kopa ba mokgatlho wa Old Bones go dira motshelo le bone ba ba bapalaletsa go tla go tshameka le bone ka fa ba etla ba rekisa dijo go kokoanya  madi a tiro e. Rre Moleele o ne a supa fa ba ile ba ikgolaganya le khampani ya  Security Systems e e thusitseng ka go fa Rre Abae tiro.

Rre Moleele a re ba leboga Security Systems go bo e supile mowa wa lerato le kutlwelobotlhoko mo setshabeng se ba direlang mo go sone, ebile a ba kopa gore ba tswelele ba dire jalo ba seka ba itsapa.

Fa a amogela ntlo eo Rre Abae a leboga botlhe ba ba nnileng le seabe mo kagong ya ntlo eo mme a ba solofetsa gore o tlaa  e tlhokomela thata ebile ga a na go ba swabisa.Rre Abae a re o lebogela go bo ba mo dirile motho mo bathong ka ba supile lerato mo go ene. BOKHUTLO