08 Aug 2024

Mothusa tona wa thuto le tlhabololo dikitso, Motlotlegi Nnaniki Makwinja a re go botlhokwa gore dikhamphani tse di ikemetseng di nne le seabe mo go thuseng dikole go imolola puso ka e lebagane le ditiro tse dintsi tsa go tlhabolola lefatshe.

Mme Makwinja o buile se jaaka a ne a amogela paka ya dikole tse di potlana kwa metsaneng ya Kweneng le Ditshukudu ka Laboroaro.

A re e re ka jaana setshwarwa ke ntsa pedi se se thata, ke ka moo ba World Group of Companies ba neng ba bona go le botlhokwa go nna le seabe mo go tsosoloseng thuto ya lefatshe leno.

“Ka tshwaragano ya lona batsadi, barutabana le dikhamphani le ka tokafatsa maduo a bana gore banne le isago e eletsegang,” ga bua Mme Makwinja.

O boletse fa thuto e ka thusa go ntsha batho mo lehumeng ka e ka kgontsha bana go itshetsa le ba malwapa a bone.

Mme Makwinja o ne a akgola ba World Group of Companies go bo ba bone go le botlhokwa go abela sekole sa Vermeleul le Ditshukudu paka ya sekole, ka jaana fa ngwana a apere sentle o ka kgona go tsena sekole a sa inyenyefatse.

Modulasetilo wa komiti ya batsadi le barutabana wa sekole sa Ditshukudu, Mme Bonyana Motswasele a re ba itumeletse go bo mothusa tona a ne a utwa dilelo tsa bone.

Mme Motswasele a re, le ntswa sekole sa bone se ne se sa dira sentle mo maduong a lekwalo la bosupa a ngwaga wa 2023, o dumela gore mo ngwageng ono ba tlaa fitlhelela seelo se ba se ipeetseng ka jaana e le barutabana ba ikiteile sehuba go thusa bana ka gotlhe mo ba ka go kgonang.

O kgothaditse batsadi go tswelela ba nna le seabe mo thutong ya bana ba bone a se re seo ke mowa wa bojammogo, fa batho ba bereka ba le seopo sengwe. Bokhutlo