08 Aug 2024

Mapodisi a Tsabong a tshegeditse monna mongwe go ba thusa ka ditlhotlhomiso mabapi le go betelela ngwana wa ga kgaitsadie yo o dingwaga tse di lesome le bone.

Go ya ka motshwarelela mookamela mapodisi a Tsabong, Assistant Supurintendent Monnathebe Mphela, tiragalo e, e diragetse ka makuku a Laboraro kwa kgotleng ya Bogosing mo Tsabong. 

Assistant Superintendent Mphela o tlhalositse fa ba ne ba kuelwa mokgosi morago ga gore monna a sweleswethane le kgaitsadie ka go batla go mmetelela mme a felela a mo gobaditse. 

O boletse fa mapodisi ba ne ba tsibosiwa ka tiragalo eo mme ba ragogela teng ba fitlhela mmelaelwa a ineile naga mme ba feta ba ragosetsa mosadi yoo kwa kokelong ya Tsabong kwa a fetileng a robadiwa go alafelwa dikgobalo tse di masisi. 

Assistant Superintendent Mphela o ne a tswelela ka go tlhalosa fa e rile mapodisi ba boa kwa sepatela ba fitlhela mmelaelwa a ne a boetse lwapeng gape mme a feta sa gogagoga ngwana wa mosetsanyana go mmetelela kwa sekgweng. 

A re mapodisi ba ne ba mo tsaya ka motlhala mme ba mo fitlhela a setse a beteletse mosetsanyana yoo kwa sekgweng yo ba fetileng ba mo ragosetsa kwa kokelong kwa a fetileng a thusiwa. 

O boletse fa mmelaelwa yo o dingwaga tse di masome a mabedi le boraro a le mo diatleng tsa mapodisi mme  a setse a itshupile fa pele ga lekgotla la ga Mmakaseterata maabane fa ditlhotlhomiso tsone di sa ntse di tsweletse. 

A re fa a ka bonwa molato o tlaa atlholwa dingwaga tse di seng kwa tlase ga lesome mo kgolegelong.

Mabapi le tiragalo eo Assistant Superintendent Mphela o ne a gakolola borre go itsheka-tsheka ka melato e e ba amang gore matsapa di a tsaya kae, fa jaanong ba iphetotse dilalome mo masikeng a bone go na le gore ba ba sireletse. 

O ne a tlatsa ka go supa fa bana e le mpho e e tswang kwa modimong ka jalo ba tshwanelwa ke go sirelediwa le go tlamelwa ke batsadi ba bone go ba betlela tsela ya bokamoso jo bo eletsegang ka e le bone babusi ba lefatshe leno ba ka moso. BOKHUTLO